Aldyn ala boljam boıynsha turǵyn úıde gaz qospasy jarylyp, 150 sharshy metr aýmaqtaǵy kireberis qulaǵan. Jarylys saldarynan 3 páter qıraǵan. Qazir turǵyn úı gazdan ajyratylyp, qoqystar tazartylýda. Tótenshe jaǵdaılar departamenti 56 jeke quramyn, onyń ishinde 1 túsirý toby jáne 9 tehnıka, jergilikti atqarýshy organdar 13 adam jáne 6 tehnıka, jedel medısınalyq kómek 12 adam jáne 6 tehnıka, Polısııa departamenti 150 jeke quram men 10 tehnıka, Ulttyq ulannyń «Batys» óńirlik qolbasshylyǵyna qarasty 5548 áskerı bóliminiń áskerı qyzmetshileri jáne 2 birlik tehnıkasyn jumyldyrdy. Aýrýhanaǵa jatqyzylǵandardyń barlyǵy travmatologııa bólimshesinde em alsa, jaǵdaıy aýyr turǵyndar jansaqtaý jáne qarqyndy terapııa anestezıologııa bólimshesine jatqyzylyp, bir pasıent oblystyq aýrýhanaǵa jedel avıasııalyq tikushaqpen jetkizildi.
Jańaózen qalalyq turǵyn úı-kommýnaldyq sharýashylyq bóliminiń habarlaýynsha, qazir úıindilerdi shyǵarý jumystary júrip jatyr. Sodan keıin ǵana apat oryn alǵan úıdiń jaǵdaıyna baǵalaý júrgizilmek. Bólimdegilerdiń aıtýynsha, apat oryn alǵan 12 páterlik úı 1977 jyly salynǵan. Bir kireberis ortalyqtandyrylǵan gazben qamtylǵan. Jalpy aýdany 621 sharshy metrdi quraıtyn úı apattyq jaǵdaıdaǵy turǵyn úı tiziminde emes. Úıindilerdi suryptap, tekserip bolǵan soń saraptama júrgizilmek. Sondaı-aq jarylystan zardap shekken jaqyn mańdaǵy úılerge jańaózendik kásiporyndar kómektespek.
О́kinishke qaraı, apattan qaıtys bolǵandar sany 4 adamǵa jetti. Oqıǵa ornynda úıindi astynda qalǵan barlyq zardap shekkender syrtqa shyǵarylyp, úıindiden tazalaý jumystary jalǵasýda. «QazMunaıGaz» UK» AQ Jańaózen qalasyndaǵy tótenshe jaǵdaı saldarynan turǵyn úısiz qalǵan otbasylarǵa jańa páter bermek, sondaı-aq zardap shekkenderge ortalyq jáne jergilikti atqarýshy organdar birlese otyryp, barlyq qajetti kómek kórsetiletinin jetkizdi.
– Qaıtys bolǵan azamattardyń otbasyna qaıǵyra kóńil aıtamyn. Zardap shekkenderge jáne olardyń otbasylaryna materıaldyq kómek kórsetiledi, jańa turǵyn úı beriledi. Apattyq jumystarǵa kómek kórsetken eriktiler men qala turǵyndaryna alǵys aıtamyn. Qazirgi ýaqytta barlyq adam úıindilerden shyǵaryldy, dedi oqıǵa ornyna kelgen oblys ákimi N.Noǵaev.
Mańǵystaý oblysy
