О́kinishke qaraı, qazirgi tańda birde-bir boksshymyzda atalǵan uıymnyń chempıondyq beldigi joq. Keshegi kúnge deıin chempıon atanyp turǵan Gennadıı Golovkın jýyrda IBF tıtýlynan bas tartqan bolatyn. Degenmen, Golovkınniń izbasarlary IBF reıtıngindegi oryndaryn jaqsartyp, álem chempıony ataǵyna jaqyndap keledi. Máselen, ekinshi orta salmaqta judyryqtasatyn Álı Ahmedov altynshy orynnan besinshi satyǵa kóterildi. Al bul salmaqtyń chempıondyq tıtýly meksıkalyq Saýl «Kanelo» Alvareske tıesili.
Al jýyrda ǵana Ońtústik Koreıada jekpe-jek ótkizip, qarsylasyn nokaýtpen jeńgen orta salmaqtaǵy Meıirim Nursultanov reıtıngtegi jetinshi ornyn saqtap qaldy. Gennadıı Golovkın orta salmaqtaǵy IBF beldiginen bas tartqan soń, chempıondyq belbeý qazir bos. Reıtıngte brazılııalyq Eskıva Falkao kósh bastap tur. Sonymen qatar ekinshi jartylaı jeńil salmaqta óner kórsetetin Sultan Záýirbek TOP-10 boksshynyń qatarynan tys qaldy. Ol qazirgi tańda 14-orynda keledi.
