Elimizde alǵash ret áleýmettik kodeks qabyldanǵan bolatyn. Kodekstegi ózgeristerdiń biri otbasynyń sıfrlyq kartasy. Mınıstr bas basylymǵa bergen suhbatynda sıfrlyq kartanyń jumys isteý júıesi týraly aıtyp berdi.
«Otbasynyń sıfrlyq kartasy degenimiz – elimizdegi otbasylardyń derbes derekqory. Bul derekqor memlekettik organdardyń qazirgi aqparattyq júıeleri negizinde qalyptastyrylyp jatyr. Ony engizýdegi maqsat – halyqtyń memlekettik qoldaý júıesine teń qol jetkizýin qamtamasyz etý.
Sondyqtan Kodekste birinshiden, Otbasylyq sıfrlyq kartany memlekettik áleýmettik saıasattyń orta jáne uzaq merzimdi mindetteri men baǵyttaryn aıqyndaý quraly retinde belgiledik. Iаǵnı memleket kimge, qashan, qandaı kómek qajettigin anyqtap qana qoımaı, áleýmettik táýekelderdiń aldyn alady», dedi mınıstr.
Sondaı-aq azamattar aqparatty SMS-habarlama arqyly ala alady.
«Ekinshiden – karta otbasylar nemese otbasy músheleriniń áleýmettik mártebesine jáne ál-aýqat dárejesine qarap, memlekettik qoldaýdyń qandaı túrin alýǵa quqyly ekendigin jetkizip otyratyn elektrondy jarshy qyzmetin atqarady. Mundaı aqparat ár otbasyna memlekettik organ tarapynan SMS-habarlama túrinde jiberilip otyr.
Úshinshiden, memlekettik qoldaý proaktıvti formatta júrgiziledi. Ol degenimiz – azamattarǵa áleýmettik tólem men kómek aqparattyq júıelerdegi derekter negizinde taǵaıyndalady degen sóz. Qoldanystaǵy qaǵaz qujattar kezeń-kezeńimen júıeden shyǵarylady», dedi mınıstr.
Tamara Dúısenova sıfrlyq júıede qatelikter ketken jaǵdaıda azamattar jergilikti halyqqa qyzmet kórsetý ortalyqtaryna júginip, sıfrlyq kartaǵa ózgeris engize alatynyn atap ótti.
