140 otbasy baspanaly boldy

  Astana kúni merekesi qarsańynda Taraz qalasynda 140 otbasy baspanaly bolý baqytyna ıe boldy. Keshegi qasıetti juma kúni turǵyn úı kezeginde turǵan osynshama otbasynyń kóp jyldardan bergi armany oryndaldy. Iаǵnı, eki kóp qabatty turǵyn úı paıdalanýǵa berildi. Qonys toıyn ótkizgenderdiń ishinde Uly Otan jáne Aýǵanstan soǵystarynyń ardagerleri, kóp balaly otbasylar bar. Qalanyń irgesinen jańadan boı kóterip kele jatqan «Báıterek» shaǵyn aýdanyndaǵy sáýleti men sáni kelisken osynaý jap-jańa baspanalarda turǵyndar úshin barlyq jaǵdaı jasalǵan. Jalpy alǵanda, sońǵy jyldary memle­ketimizdiń serpindi damyp, turǵyn úımen qamtý baǵdarlamalarynyń júzege asyrylýymen halqymyzdyń páterli bolýǵa degen senimi kúsheıdi. «Báıterek» shaǵyn aýdanynda osymen 17 turǵyn úı paıdalanýǵa berildi. Bul aýdannyń bolashaǵy jarqyn dep aıtýǵa ábden bolady. Munda abattandyrý, jol salý, kógaldandyrý jumystary qarqyndy júrgizilip keledi. Qazir mektep, balabaqsha ǵımarattary salynyp jatyr. Balalarǵa arnalǵan eki aýrýhana bar. Jaıly baspanaǵa ıe bolǵandardyń  biri – aýǵan soǵysynyń ardageri Elibaı Baımahanov osy kúndi 20 jyl boıy kútkenin aıtady. Tórt balanyń ákesi otbasyn qýanyshqa bólegen bul kúndi esh umytpaıtyny anyq. «Astana kúni merekesine oraı baspanaly bolyp jatqany­myzdy jaqsylyqqa balap otyrmyn. Endi osy shańyraǵym Astana sekildi qonaqjaı, nesibeli, sáýletti bolady dep oılaımyn», deıdi ol aǵynan jarylyp. Jambyl oblysy ákiminiń birinshi orynbasary Bekbolat Orynbekov baspanaly bolǵandardy qýanyshymen quttyqtap, jyldyń sońyna deıin taǵy da úsh kóp qabatty úı paıdalanýǵa beriletinin jetkizdi. El ekonomıkasynyń qaryshtap ósýiniń nátıjesinde oblysta qurylys qarqyny erekshe. Bekbolat Serikbekulynyń qolynan alǵash bolyp páter kiltin alǵan Uly Otan soǵysynyń ardageri Bertaı Jaskılenov «El aman bolsyn, osy baqytty eldiń baǵyna bitken Elbasyna Alla qýat bersin», dep batasyn berdi. Qonys toıy qutty bolsyn, aǵaıyn! Oralhan DÁÝIT, «Egemen Qazaqstan». Jambyl oblysy. Sýretterdi túsirgen  Aqádil RYSMAHAN.