Ekonomıka • 29 Sáýir, 2023

Qazaqstan-Armenııa arasyndaǵy taýar aınalymy 81,8% ósti

237 ret kórsetildi

Erevanda QR Premer-Mınıstriniń orynbasary – saýda jáne ıntegrasııa mınıstri Serik Jumanǵarın men Armenııanyń vıse-premeri Mger Grıgorıannyń tóraǵalyǵymen ekonomıkalyq yntymaqtastyq jónindegi Qazaqstan-Armenııa úkimetaralyq komıssııasynyń 9-shy otyrysy ashyldy, dep habarlaıdy Egemen.kz Úkimet basshysynyń baspasóz qyzmetine silteme jasap.

Qazaqstan-Armenııa arasyndaǵy taýar aınalymy 81,8% ósti

Úkimetaralyq komıssııa 1999 jyly qurylǵan. Osy ýaqyttan beri eki el arasyndaǵy saýda-ekonomıkalyq jáne mádenı-gýmanıtarlyq baılanystar tek nyǵaıa tústi.

Máselen, 2022 jyly Qazaqstan men Armenııa arasyndaǵy taýar aınalymy $41,6 mln boldy, bul byltyrǵy osy kezeńmen salystyrǵanda, 99,8%-ǵa joǵary ($20,8 mln). Al eksport – $10,3 mln-nan $26,9 mln-ǵa deıin, ımport – $10,5 mln-nan $14,7 mln-ǵa deıin 40,2%-ǵa ósti. 

Byltyr Qazaqstannan Armenııaǵa aýyl sharýashylyǵy, azyq-túlik ónimderi, elektr akkýmýlıatorlary, legırlenbegen bolattan jasalǵan jalpaq prokattar jáne basqa da ónimder eksporty artty. Eki el arasyndaǵy ımporttyń negizgi bóligin mashınalar men jabdyqtar, laktar men boıaýlar, dárilik zattar jáne basqa da taýarlar quraıdy.

2023 jylǵy qańtar-aqpanda taýar aınalymy 81,8%-ǵa ósip, $4,6 mln boldy. Qazaqstannan Armenııaǵa eksport 2,7 esege ulǵaıyp, $2 mln-ǵa; Armenııadan Qazaqstanǵa ımport $2,6 mln-ǵa deıin 46,2%-ǵa ósti.

Úkimetaralyq komıssııanyń teń tóraǵalarynyń ekijaqty kezdesýi barysynda byltyrǵy jáne 2023 jylǵy 2 aıdaǵy oń dınamıkaǵa súıene, eki el arasyndaǵy yntymaqtastyqtyń áleýeti zor ekendigi atap ótildi. 

«Múmkindikter terezesi» metallýrgııa, aýyl sharýashylyǵy, farmasevtıka, aqparattyq-kommýnıkasııa, kólik, energetıka, týrıstik jáne basqa da salalarǵa ashylǵan.

Úkimetaralyq komıssııanyń plenarlyq otyrysynda ekijaqty yntymaqtastyqty keńeıtý maqsatynda armıan tarapy qyzyǵýshylyq tanytqan qazaqstandyq kompanııalardy Armenııa aýmaǵynda ótkiziletin tenderlerge, sondaı-aq Gıýmrı qalasynda logıstıkalyq ortalyq (dry port) qurý jobasyna qatysýǵa shaqyryp, qazaqstandyq uıymdardyń Armenııa aýmaǵyndaǵy qurylys jumystaryna qatysýyna múmkindikter bar ekendigin aıtty.

О́z kezeginde qazaqstandyq tarap seriktesterdi Qazaqstannan Armenııaǵa  shıkizatty da, daıyn ónimdi de, onyń ishinde, metallýrgııa, munaı-hımııa ónerkásibi, aýyl sharýashylyǵy óndirisi taýarlaryn eksporttaý múmkindigi týraly habardar etti.

Otyrys qorytyndysy boıynsha taraptar eki eldegi kompanııalar men isker toptardyń qyzmetin qoldaý, birlesken kásiporyndar qurý, Qazaqstan men Armenııa aýmaqtarynda sharýashylyq júrgizýshi sýbektilerdiń ókildikteri men fılıaldaryn ashý, shaǵyn jáne orta kásipkerlikti qoldaý, eksportty ilgeriletý jáne ınvestısııalar tartý týraly ýaǵdalasty.

Úkimetaralyq komıssııa turaqty negizde jylyna eki ret eksportqa baǵyttalǵan ónimder týraly aqparat almasýǵa, syrtqy saýda kólemin ulǵaıtý maqsatynda mýltımodaldy tasymaldardy júzege asyrý úshin eki eldiń kólik-logıstıkalyq múmkindikterin keńeıtý týraly júıeli túrde habardar etý týraly sheshim qabyldady.

Sondaı-aq IT, mádenıet jáne týrızm salalaryndaǵy yntymaqtastyqty keńeıtý máseleleri, atap aıtqanda, Qazaqstan men Armenııa arasynda tikeleı áýe reısteriniń sanyn arttyrý jáne Astana men Erevan arasynda tikeleı áýe qatynasyn ornatý múmkindikteri talqylandy.

Qarjy tehnologııalary men elektrondy kommersııa salasyndaǵy yntymaqtastyqty damytý maqsatynda «Qazposhta» AQ men «Haıpost» JAQ arasyndaǵy yntymaqtastyqty damytý máseleleri qaraldy. Osy jáne ózge de kelisimder qol qoıylǵan birlesken hattamada bekitildi.

Sondaı-aq otyrys barysynda taraptar QR Eńbek jáne halyqty áleýmettik qorǵaý mınıstrligi men AR Eńbek jáne halyqty áleýmettik qorǵaý mınıstrligi arasynda áleýmettik-eńbek salasyndaǵy yntymaqtastyqqa nıet týraly memorandýmǵa jáne QR Mádenıet jáne sport mınıstrligi men AR Bilim, ǵylym, mádenıet jáne sport mınıstrligi arasyndaǵy 2023-2025 jyldarǵa arnalǵan mádenıet salasyndaǵy yntymaqtastyq baǵdarlamasyna qol qoıdy.