Otyrys barysynda Memleket basshysy – Qazaqstan Qarýly Kúshteriniń Joǵarǵy Bas qolbasshysy Qasym-Jomart Toqaev taǵy bir jaǵymdy jańalyqpen bólisti. Endi merzimdi áskerı qyzmettegi sarbazdar nesıesin tóleý mindetinen ýaqytsha bosatylady.
«Áskerı qyzmette «áleýmettik lıfttiń» bolýy mańyzdy. Sol arqyly jastardyń qoǵamnan óz ornyn tabýǵa múmkindik berýimiz kerek. Qazir osy baǵytta naqty jumys jasalyp jatyr. Áskerı boryshyn ótep kelgen azamattar endi joǵary oqý ornyna jeńildikpen túsedi. Merzimdi áskerı qyzmettegi sarbazdar nesıesin tóleý mindetinen ýaqytsha bosatylady. Sondaı-aq olar ózderi qalasa, armııa qatarynan naqty mamandyq alyp shyǵady. Jalpy, sarbazdardy áleýmettik qoldaý sharalaryn meılinshe kóbeıtý qajet», dedi Prezıdent.
Memleket basshysynyń aıtýynsha, áskerı qyzmetshilerge jaqsy jalaqy tólenýi kerek. Prezıdenttiń aıtýynsha, el Úkimeti Kúshtik qurylymdarǵa eńbekaqy tóleýdiń biryńǵaı júıesine kóshken kezde dál osyny eskerýge tıis. Sondaı-aq Qazaqstanda áskerı qyzmetshilerdi zeınetaqymen qamtý máselesi de qaıta qaralyp jatyr.
«Bıyl áskerı ushqyshtardyń jalaqysy ortasha alǵanda 60 paıyzǵa ósedi. Osy saladaǵy oqytýshylar men dárigerlerdiń jalaqysy da kóbeıedi. Kelesi jyly áskerı ataq úshin tólenetin aılyq aqy 30 paıyzǵa artady. Áskerı qyzmetshilerdi zeınetaqymen qamtý máselesi de qaıta qaralýda. Serjanttardy, ofıserlerdi áleýmettik qoldaý jumysy jalǵasady. Olar turmysyna alańdamaı, el qorǵaýǵa saqadaı saı bolýy kerek», dep qosty Qasym-Jomart Kemeluly.
