Kegen aýdanynan irgesi ajyrap, qaıta qalpyna kelgenine bes jyl tolǵan Raıymbek aýdanynda búginge deıin birqatar áleýmettik, sporttyq-mádenı nysandar boı kóterip, halyqtyń ıgiligine berilip jatyr. Tumsa tabıǵaty qandaı kórkem bolsa, shekara shebindegi halyqtyń ál-aýqaty men turmys-tirshiligi de kóz súısiner kúıde bolýy asa mańyzdy. Mamyrajaı mamyr merekelerine oraılastyryla tusaýy kesilgen ıgilikti sharaǵa Raıymbek aýdanynyń ákimi Berik Dúısenbaev pen aýdandyq máslıhat tóraǵasy Samat Músirbaev bastaǵan ıgi jaqsylar men jaısańdar qatysyp, turǵyndardy qýanyshtarymen quttyqtady.
Ekinshi dúnıejúzilik soǵystyń qurbandaryna arnalǵan eńseli eskertkishke gúl shoqtaryn qoıyp, rýhyna taǵzym etýden bastalǵan is-sharada jyrshy, termeshi Serik Ábdiraıymov jyrdan shashý shashty.
«Búgingi mádenıet úıinen bólek, Qyzylshekara, Súmbe aýyldarynda zamanaýı shaǵyn sport keshenderi salynyp jatyr. El ıgiligine beriler ýaqyty alys emes. Sonymen birge qaıta túlegen aýdanymyzdyń Jambyl aýylynda mádenıet úıi salyndy. Qaqpaq aýylyndaǵy mádenıet úıi kúrdeli jóndeýden ótkizildi. Aldaǵy jyldary Shalkóde, Saryjaz, Tegistik aýyldarynan jańadan mádenıet ǵımarattary boı kóteretin bolady», dedi saltanatty jıynda sóz alǵan aýdan ákimi B.Dúısenbaev.
Aýdandyq aqsaqaldar keńesiniń tóraǵasy, Qazaqstannyń eńbek sińirgen jattyqtyrýshysy, Almaty oblysynyń Qurmetti azamaty Bekbolat Birbaev aqjarma tilegin arnady. Is-shara barysynda týǵan jerge týyn tigip, Súmbeniń áleýmettik jaǵdaıyn jaqsartýǵa baryn salyp júrgen atpal azamat Tilek Iýsýpovqa aıryqsha qurmet kórsetildi.
Shekara shetindegi aýyldyń ajaryn ashqan mádenıet úıiniń qurylysyna bıýdjetten 475 mln teńge bólinip, ıgerilgen. 180 oryndy óner ordasyna 4 shtat birligi bólingen. Aýyl mádenıetin kóterip, ónerin óristetetin bul ǵımaratta aldaǵy ýaqytta túrli úıirmeler ashylyp, jumysyn bastaıtyn bolady.
Almaty oblysy
