«Oblysymyz bilekti de júrekti balýandardan kende emes. Tuńǵysh «Qazaqstan barysy» Ulan Rysqul bizdiń óńirdiń týmasy ekeni barshaǵa málim. Byltyr bul jobanyń 10 jyldyq mereıtoıy atalyp ótti. Osy jyldar aralyǵynda oblysymyz dúbirli dodaǵa óziniń apaıtós balýandaryn qosyp keledi. Al óńirdegi kil myqtydan kim myqty ekeni búgingi saıysta belgili bolady. Sondyqtan týrnırge qatysýshylarǵa sáttilik tileı otyryp, respýblıkada Almaty oblysynyń mereıin asqaqtatar naǵyz sheber jeńiske jetsin», dedi jarystyń ashylý saltanatyna qatysqan aımaq basshysy Marat Sultanǵazıev.
Qonaev qalasynyń ortalyq alańynda ótken týrnırde aımaqtyń túkpir-túkpirinen salmaǵy 90 kılodan joǵary 28 balýan beldesti. Olardyń barlyǵy óz óńirlerinde úzdik úshtikten kóringen sportshylar.
Jarys qorytyndysynda barlyq qarsylasyn tize búktirip, «Alataý arlany» atanǵan Qonaev qalasynyń ókili Mádı Edilbaev altyn belbeýdiń ıesi atanyp, 5 mln teńge aqshalaı syılyqqa ıe boldy. Endi Mádı respýblıkalyq týrnırde oblystyń namysyn qorǵaıtyn bolady.
Al Eńbekshiqazaq aýdanynan shyqqan balýan Nurǵalı Joltaev ekinshi oryndy ıemdenip, 1 mln teńgeniń sertıfıkatyn alsa, Balqash aýdanynan qatysqan Álimjan Jumahmetov úshinshi orynǵa taban tirep, 500 myń teńgeni qanjyǵasyna baılady.
Almaty oblysy
