Dýrbandaǵy dodaǵa daıarlyq

Atalǵan jarysta elimizdiń segiz sportshysy baq sy­naıdy. Olar – Kırıll Gera­sımenko (je­ke, juptyq jáne aralas jup­tyq saıys), Alan Qur­man­ǵalıev (juptyq saıy­s), Aıdos Kenjeǵulov (aralas jup­tyq saıys), Denıs Jolýdev (juptyq saıys), Saǵyntaı Qur­mambaev (juptyq saıys), Anas­tasııa Lavrova (jeke, jup­tyq jáne ara­las juptyq saıys), Záýresh Aqasheva (jeke, juptyq jáne ara­las jup­tyq saıys) jáne Sar­vınoz Mir­qadyrova (jeke saıys).

Joǵaryda esimderi atalǵan sportshylar arasyndaǵy eń úz­digi Kırıll Gerasımenko ekeni sózsiz. 26 jastaǵy as­ta­nalyq sań­laq álemdik reıtıngte 53-oryn­da tur. Bul – kezinde KSRO quramynda bolǵan mem­le­ket ókilderi ara­syndaǵy eń úz­dik kórsetkish. Kı­rıll Rıo-de-Janeıro jáne Tokıo Olım­pıadalary men álem chem­pıo­nattaryna qa­ty­syp, kóptegen ha­lyqaralyq jarys­tarda júlde alyp júr. Sol seb­epti de oǵan Dýr­banda zor senim artylyp otyr.

Keıingi jyldary óreli óne­rimen kózge tú­sip júrgen 16 jastaǵy Alan Qurmanǵalıev te OAR-dan oljaly oralady dep úmittenemiz. Jastar býyny arasyndaǵy jarys­tarda jasyndaı jar­qyl­daǵan jerlesimiz eresekter dýynda da ózin jaqsy qyrynan kór­sete bildi. Qazirgi kezde ol álem­dik reıtıngte 207-oryndy enshileıdi. Sondaı-aq basqa da otan­dyq ústel ten­nıs­shileri jer-ja­hannyń myq­tylary bas qos­qan jarysta baryn salýǵa tıis.

Jalpy, ústel tennısinen álem chempıonaty 1926 jyldan beri uıymdastyrylyp keledi. Alǵashqy jarystyń tusaýy Londonda ke­sildi. Sol básekelerde eń kóp júl­de al­ǵan – Qytaı quramasy. Olar barlyǵy 407 (145 altyn+103 kú­mis+159 qola) medal oljalady. Ekinshi jáne úshinshi oryn­dardy Ma­jarstan (68+58,5+75,5) men Japonııa (48+36+73) ıelenedi. Sondaı-aq Chehııa (28+34,5+59), Rý­­mynııa (16,5+10,5+19), An­glııa (15+20+61), Shvesııa (13+15+12,5), AQSh (9,5+2+20), Aýs­­trııa (6+15,5+19) jáne Ger­ma­nııa qu­ra­­malary (5+16,5+21,5) TOP-10 ko­man­danyń qataryna enip otyr.

Qazirgi kezde sporttyń bul túrinde Qytaıdyń qarqynyna eshbir komanda tótep bere alatyn emes. Erler arasyndaǵy je­kelegen básekelerde sol el­diń órenderi qatarynan toǵyz jarys­ta top jarsa, áıelderi 14 jyl boıy qarsylas shydatar emes. Sonymen qatar juptyq jáne aralas juptar saıysynda da qytaılyqtardyń aldyna eshkim túse almaıtyndaı. 

Sońǵy ret ústel tennısinen álem chempıonaty 2021 jyly AQSh-tyń Hıýston qalasynda uıym­dastyryldy. Sol ja­rys­­ta sarapqa salynǵan bes bas júldeniń tórteýin Qytaı qu­rama ko­man­dasynyń músheleri oljalady. Tarqatyp aıtsaq, erler arasynda 26 jastaǵy Fan Chjendýnge teń keler esh­­­kim tabylmady. Fı­nalda ol shvesııalyq Trýls Mıo­regordty utty. Áıelder saıysyna 24 jas­taǵy Van Manıýıdiń mereıi ústem boldy. Aqtyq synda ol óziniń otandasy Sýn Inshadan aılasyn asyrdy. Sol sekildi áıel­derdiń juptyq jáne aralas juptardyń tar­tysynda da Qytaı eli ókil­deriniń asyǵy alshysynan tús­ti. Tek erlerdiń jup­tyq básekesinde olarǵa bas júlde buıyrmady. Bul jarysta qura­mynda Krıstıan Karls­son men Mat­tıas Falk syndy she­­ber­­leri bar Shve­­­sııa qu­ramasy sha­shasyna shań juq­tyr­mady.