Is-sharaǵa Ulttyq bank tóraǵasy Ǵalymjan Pirmatov, Prezıdent Ákimshiligi Basshysynyń birinshi orynbasary Tımýr Súleımenov, Premer-mınıstrdiń orynbasary – qarjy mınıstri Erulan Jamaýbaev, Qarjy naryǵyn retteý jáne damytý agenttiginiń tóraǵasy Mádına Ábilqasymova, Ulttyq ekonomıka mınıstri Álibek Qýantyrov qatysty.
Qasym-Jomart Toqaevqa 2022 jylǵy aqsha-kredıt saıasatynyń júzege asyrylý nátıjeleri, qarjy turaqtylyǵyn qamtamasyz etý sharalary, sondaı-aq Ulttyq banktiń altyn-valıýta qory men Ulttyq qor aktıvteriniń jaı-kúıi jóninde baıandaldy.
Prezıdentke ótken jyldyń qorytyndysy boıynsha ekonomıkany dollarlaý kórsetkishi 31,6 paıyzǵa azaıǵany, ekinshi deńgeıdegi bankterdiń ekonomıkaǵa kredıt bólý kólemi 23,3 paıyzǵa artyp, 22,8 trıllıon teńgege deıin jetkeni, sonyń ishinde bızneske berilgen kredıttiń 13,9 paıyzǵa ósip, 9,6 trıllıon teńgeni quraǵany jóninde málimet berildi. Jalpy ekonomıkaǵa bólingen kredıt 2022 jyly 21,7 paıyzǵa ósti. 2023 jyldyń 1 qańtaryndaǵy málimet boıynsha onyń kólemi 28,9 trıllıon teńgeni qurady.
Ulttyq banktiń deregi boıynsha byltyr jalpy halyqaralyq rezervter 1,2 mıllıard dollarǵa kóbeıip, 90,8 mıllıard dollarǵa jetti. Sonyń ishinde altyn-valıýta qory – 35,1 mıllıard dollar, Ulttyq qor aktıvteri – 55,7 mıllıard dollar. 2014 jyly biriktirilgen ýaqyttan beri BZJQ zeınetaqy aktıvteri kirisiniń jyldyq mólsheri 9,33 paıyzdy qurady.
Ulttyq banktiń málimeti boıynsha Fitch Ratings jáne S&P Global Ratings halyqaralyq reıtıng agenttikteri Qazaqstannyń «VVV» deńgeıindegi derbes reıtıngine qatysty «turaqty» degen boljamdy rastady.
Memleket basshysynyń aıtýynsha, ınflıasııa, makroekonomıkalyq jáne energetıkalyq turaqsyzdyq áli de ekonomıkanyń negizgi túıtkilderi retinde saqtalyp otyr.
– Halyqaralyq uıymdar Halyqaralyq valıýta qorynyń baǵalaýy boıynsha jahandyq ósim 2021 jylǵy 6,2 paıyzdan 3,4 paıyzǵa deıin aıtarlyqtaı báseńdeıtinin jáne baǵa qysymy kúsheıetinin boljap otyr. Munyń bári elimizdiń ekonomıkalyq damýyna áser etedi, sondaı-aq Úkimet pen Ulttyq bankke jáne basqa da memlekettik organdarǵa anaǵurlym úılesimdi ári tıimdi jumys júrgizý qajet ekenin bildiredi, – dedi Qasym-Jomart Toqaev.
Talqylaý qorytyndysy boıynsha Prezıdent jyldyq esepti maquldady.
