Sýretti túsirgen Iýrıı Kım
Jalpy, eńbek ótili eki ǵasyrdan asatyn dárigerler áýleti Ýmarovtar, azamattyq qorǵaý organynyń ókilderi Aqsaqalovtar jáne ustazdar otbasy Arıshevter de merekelik is-sharada belsendilik tanytty.
«Ákemiz salǵan joldy biz de tańdaǵanbyz. Búginde densaýlyq saqtaý salasynda áli kúnge jemisti eńbek atqaryp júrmiz. Inilerim, sińililerim de aqhalatty abzal jandar. Saladaǵy tájirıbem otyz jyldan asty. Árıne kez kelgen otbasy baqytty bolýy úshin eń aldymen densaýlyq myqty bolýy qajet. Sondyqtan Otanymyzdaǵy árbir otbasyna densaýlyq tileımin», deıdi joǵary sanatty dáriger, kardıolog Gaýhar Ýmarova.
Bul kúni «Otbasy aǵashy» respýblıkalyq aksııasy aıasynda ortalyq saıabaqqa tal-daraq otyrǵyzyldy.
Is-sharaǵa belsene qatysqan «Mereıli otbasy-2022» ulttyq baıqaýynyń oblystyq kezeńiniń jeńimpazy, jetimder úıinen 16 ul-qyzdy asyrap alyp, baýyryna basqan Sapýra Erjanqyzy jas otbasylarǵa izgi tilegin arnady.
Merekelik is-shara sporttyq jaryspen jalǵasyn tapty. Sondaı-aq búldirshinder óz otbasylarynyń sýretin salyp, topqa tústi. Olarǵa 500-den asa tegin balmuzdaq úlestirildi. Saltanatty is-shara sońy konserttik baǵdarlamamen qorytyndylandy.
«Otbasy – biz úshin qaı kezde de eń qasterli uǵym. Búgin jarym Madına Shakırova ekeýmiz aıtýly datany alǵash ret merekelep otyrmyz. Jas otbasylar úshin uıymdastyrylǵan ıntellektýaldy oıyndarǵa belsendi túrde qatystyq. Oıyn barysynda otbasy qundylyqtaryna qatysty qyzyqty saýaldar men tapsyrmalar berildi. Úlkenderdiń batasyn alyp, marqaıyp qaldyq. Qudaı bizdi solardyń jasyna jetkizsin», deıdi jas shańyraqtyń ıesi Nurmuhammed Seıitov.
Jambyl oblysy
