Tashkentten oljaly oralǵan saıypqyrandardy jankúıerler sán-saltanatymen qarsy aldy. Jahandyq alamanda 71 kg salmaqta top jarǵan ulttyq quramanyń kapıtany Aslanbek Shymbergenov pen 67 kg salmaq dárejesinde kúmis júldeger atanǵan Dýlat Bekbaýovqa jambyldyqtar tarapynan zor qurmet kórsetildi.
Álem chempıonatynan oljaly oralǵan sańlaqtardyń jeńisti joryǵyn jergilikti atqarýshy bılik eleýsiz qaldyrǵan joq. О́ńir basshysy Nurjan Nurjigitov álem chempıony Aslanbek Shymbergenovke úsh bólmeli páterdiń kiltin tabystasa, kúmis júldeger Dýlat Bekbaýov eki bólmeli páterge ıe boldy. Aslanbektiń bapkeri Ermek Ertaevqa bes mıllıon, Dýlattyń jeke jattyqtyrýshysy Nurlan Aqúrpekovke úsh mıllıon teńgeniń sertıfıkaty tapsyryldy.
«Jahandyq jarysta Kók Týymyzdy kókte jelbiretken Aslanbek pen Dýlattyń jeńisti joly jalǵasty bolsyn. Jambyl boks mektebiniń dańqyn asyrǵan boksshylarymyzǵa rızamyz. Munymen toqtap qalýǵa bolmaıdy. Alda tórtjyldyqtyń basty dodasy – Olımpııa oıyndary tur. Sportshylarymyz Olımpıadaǵa qatysýǵa múmkindik beretin lısenzııany jeńip alyp, Parıj tórinde de Kók Týymyzdy kókke kóteretin kúndi kóreıik», dedi óńir basshysy boksshylardy quttyqtap.
71 kg salmaq dárejesinde topqa túsip júrgen Aslanbek Shymbergenovtiń Olımpııa oıyndaryna qatysatyn múmkindigi mol. Qurlyqtyq dodada jáne álem chempıonatynda top jarǵan sportshynyń jalǵyz armany – Olımpıada altyny.
«Endigi maqsatym – Parıjde ótetin Olımpııa oıyndaryna lısenzııa ıelenip, tórtjyldyqtyń basty dodasynda top jarý. Maqsatty aqıqatqa aınaldyrý úshin bar kúshimdi sarqa jumsaıtyn bolamyn», deıdi Álem chempıony.
Jambyl oblysy
