Shedevrler kóńildi túrtpektep, júrekti qozǵaǵan shabyttan týsa kerek. Alaıda ol qaıdan, qalaı keletinin dóp basyp aıta almaımyz. Ár shyǵarmashylyq adamy ózinshe túısinedi. Árkimniń shabyt shaqyratyn óz tásili bar. Máselen, Harýkı Mýrakamı ónimdi jazý úshin boıyn bosqa salatyn erkindikten góri tártipti jón sanaǵan. Joq sol tártip shabyt bergen. Ol kún saıyn tańǵy tórtte turyp, 10 km júgirgen ne 1 500 m júzgen. Keıde ekeýine de úlgeretin. Tánin shyńdap, janyn qýattaǵan áserden soń bes-alty saǵat jumys istegen. Odan keıin kúni boıy kitap oqyp, erterek uıqyǵa jatqan. Osy rejimdi ustaǵan jazýshy «men áserlený úshin óz-ózimdi tańǵaldyratyn ispen aınalysamyn», deıdi.
Qalamger qarańǵylyq qushaǵynda oıymen ońasha qalyp, kóbirek áserlenedi. Asqar Súleımenov te túnde jazǵandy jaqsy kórgen. Jazýshy shabytty shaq sol dep esepteıdi. Muqaǵalı Maqataev ta «Tún maǵan uıyqtaý úshin berilmegen», demeı me.
Al esepti sheshý úshin shabyt keregin bilip pe edińiz. Ataqty matematık Asqar Jumadildaev qolyna dombyra alsa, ne kúı tyńdasa ıa óleńge ańsary aýyp, qalamǵa jarmasa bastasa, qısyny kelmeı turǵan esepti qınalmaı shyǵaratyn kórinedi. Matematıkke de, sýretkerge de ortaq nárse qııal men sezim eken.
Aqyn, sýretshi, kınorejısser Rıchard Sıkenniń tásili tipten qyzyq. Birinshi kitaby jaryq kórgen soń, aıtary taýsylyp, jan dúnıesi bos qalǵandaı kúı keshedi. Alaıda sýretshilik óneri ekinshi tynysyn ashyp, jazýǵa degen yntasyn oıatady. Biraq qyzyǵy bul emes. Ol «О́zim jek kóretin shyǵarmalardy oqyǵanda, oǵan qarsy birdeńe istegim kelip turady», deıdi. Osylaı ózi unatpaıtyn oılarmen qaıshylyqqa túsý arqyly shabyttanǵan. Bálkim, óz oıyń bar tulǵa ekenińdi seziný uly kúsh shyǵar?
Rasynda oıdy oı qozǵaıdy. Keıde, jazýshyǵa jazýshy da áser etedi. Máselen, Gabrıel Garsıa Markesti oba taqyryby qyzyqtyryp, Danıel Defonyń «Oba kúndeligi» kitaby shabyt bergen. Al Madlen Mıllerdiń «Ahılles ánin» jazýǵa Patrokl men Ahıllestiń «Ilıadadaǵy» qarym-qatynasy áser etken. Aıtpaqshy, sulý sózdi súıetinder de bar. Mysaly, Merılın Robınsondy ózi jazǵan kórkem sýretteýler shabyttandyrǵan.
Al Qadyr Myrza Álı bolsa, ózgeniń oıymen emes, óz oıymen arpalysta shabytyn tapqan. «Júrek pen júıkesi egeskende, jyr kóńili tolǵatqan». Aqyn sondaı bir shaǵyn dóp basyp keremet sýretteıdi. О́leńniń ózin oqyp kórińizshi.
Serpindi oı ishti kerneıdi,
Soǵysa ketken kóp sendeı.
Qudaıdy kóziń, kórmeıdi,
Kóregen biraq joq sendeı.
Qas-qaǵym ýaqyt ishinde
Uǵasyń bárin dana bop.
Qas-qaǵym ýaqyt ishinde
Shyǵasyń jáne bala bop.
Jatasyń sosyn boı jazyp,
Aqynǵa bir sát sanalmaı.
Tamasha jyrdy men jazyp
Tastadym deýge sene almaı!
Shynynda solaı. Beımálim alapat kúshtiń erkimen el túgil, óziń tańǵalatyn dúnıe týdyrasyń. Qyzyq, ıá?..
Shyn talantqa shabyttyń keregi joq. Babyń kelisse bárin isteýge bolady deıtinder bar. Dese de, ózińdi áserlendirmegen dúnıe ózgeniń júregine qalaı jetsin? Shabytty shaqta keshken sezim shynaıy emes pe?!
