Prezıdent bilim berý, ǵylymı-zertteý jumystarymen jáne joǵary oqý ornyn odan ári damytý strategııasymen tanysty.
Qazir ýnıversıtette 6 myńnan astam stýdent oqıdy. Ýnıversıtet bazasynda jańa oqý-zerthana korpýsy iske qosylǵan. Onda stýdentter men oqytýshylardyń túrli tájirıbeler jáne ǵylymı zertteýler júrgizýine barynsha jaǵdaı jasalǵan.
Prezıdent ushqyshsyz basqarylatyn ushý apparattaryna arnalǵan laboratorııany da aralap kórdi. Onda stýdentter GIS-tehnologııa arqyly jerdi qashyqtan zondtaý derekterine taldaý jasaýdy úırenedi.
Budan bólek, Qasym-Jomart Toqaevqa konfıgýrasııasy kúrdeli detaldar alý jónindegi ınnovasııalyq ádister, sımýlıasııalyq oqytý jáne praktıkalyq daǵdylar ortalyqtary kórsetildi.
Prezıdent ýnıversıtetti aralaý barysynda oqytýshylarmen jáne stýdenttermen áńgimelesti.
«Men bul salaǵa erekshe mán beremin. Atalǵan máselelerdiń bárine basymdyq beremiz. Sebebi bilim, bilim mádenıeti bolmasa, Qazaqstan ári qaraı damı almaıdy. Jaqynda biz Ǵylym akademııasyna reforma júrgizdik, óte tanymal ári praktık ǵalymdy prezıdent etip taǵaıyndadyq. Ǵylym jónindegi joǵary keńestiń birinshi otyrysyn ótkizdim. Taıaý arada sizder de ǵalymdar men tájirıbeli mamandardyń qataryn tolyqtyryp, memleketimizdiń damýyna eleýli úles qosasyzdar dep sanaımyn. Men jastarǵa senemin», dedi Qasym-Jomart Toqaev.
