Foto: khabar.kz Nýrıkamal Seıitjanova
Bir ǵumyr bir ánniń ǵumyry úshin jaralǵandaı. Eń taza sezim men óner úshin... Ánniń boıyndaǵy náziktik pen syrly saz týyndyǵa mýza bolǵan Nýrıkamaldyń beınesi. Án keıipkerdiń atymen atalǵan.
«Júregimdi eljiretken,
Janym, qandaı jaıdary ediń», osy joldarda kompozıtordyń ǵashyqtyq kúıi bar. Qyzyǵy, án mátinin kompozıtordyń jary jazyp bergen.
«Biz kóktemde bala-shaǵamyzdy ertip, dostarmen tabıǵat aıasyna shyqtyq. Úsh qyzymmen gúl terip júrgende jubaıyma kózim tústi. Bir tóbeshikte temekini burqyratyp tur eken. «Mynaǵan ne boldy?» dep oıladym. Kóp ótpeı samaýryn da qaınady. Turdyekeń shaıdyń aldynda Nýrıkamaldy bıge shaqyrdy. Ol bas tartty. «Meniń kúıeýim shaqyrǵanda bıge shyqpaıtyn bul qandaı áıel?» dep tańyrqadym. Sosyn jubaıymnyń ǵashyq bolǵanyn ańǵardym. Sol kúni tabıǵat aıasyna birge barǵanymyzben, qaıtýymyz bólek boldy.
Úıge kelgen soń jatyn bólmede balalarmen jattym. Kenet pıanınonyń daýysyn estidim. Bir erekshe ánniń ómirge kelgenin sezdim. Jubaıym ony qaıta-qaıta oınady. Áni bar, biraq sóz joq. Tek yńyl ǵana. Sosyn jubaıymnyń bólmesine baryp, odan qalam men qaǵaz suradym. Tunshyǵyp, jaryqqa shyǵa almaı jatqan sózin jazbaq boldym.
«Aspandaǵy aı ma dedim,
Jastyq shaǵym qaıda meniń?
Júregimdi eljiretken,
Janym, qandaı jaıdary ediń», degen óleń joldary oıyma keldi. Qaǵazǵa túsirdim.
«Osy ma aıtqyń kelgeni?» dedim.
Ol «osy» dep qysqa qaıyrdy.
Sosyn ǵashyq bolǵan adamynyń esimin suradym.
«Nýrıkamal, Kamalym-aı,
Kúndeı ashyq janaryń-aı,
Qolym jetpeı, sózim de ótpeı,
Jaýtańdadym, qabaǵyńa-aı, qaraǵym-aı» dep jazdym. Áýenine sózi úılese ketti. Ary qaraı taǵy eki shýmaǵyn qaǵazǵa túsirdim. Sosyn ol ándi mátinimen birge aıtyp kórdi. Unatty, maǵan da unady.
Keıin arada biraz ýaqyt ótken soń men Nýrıkamalǵa bul ánniń ózine arnap jazylǵanyn aıttym. Ol kezde biz onymen dos retinde aralasatynbyz», deıdi kompozıtordyń jary suhbattarynyń birinde.
Aqyn Hanbıbi Esqaraqyzy esteliginde: «Ol qandaı adam, menen artyq pa?» dep oıladym. Áıeldiń barlyǵynda derlik egoıstik sezim bolady. Biraq kóbi jaǵdaıdyń baıybyna bara bermeıdi», dep áıelge tán qyzǵanyshtyń bolǵanyn jasyrmaıdy. Degenmen, Nýrıkamaldy kórgennen keıin kúıeýiniń talǵamyna rıza bolǵanyn aıtady. «Ol boıjetkenge ǵashyq bolmaý múmkin emes edi. Osylaısha, «Nýrıkamal» áni dúnıege keldi. Bul ándi Estaıdyń Qorlany sııaqty baǵaladym», deıdi aqyn.
Kompozıtor Turdyqylysh Iztaevtyń «Nýrıkamaly» kópshilikke Jubanysh Jeksenulynyń oryndaýynda tanyldy. Al ánniń alǵashqy oryndaýshysy Qurman Shoıynbekov bolǵan.
Ánniń keıipkeri Nýrıkamal 2021 jyly dúnıeden ótti.
