Beınettiń zeıneti – jańa úı

Dálirek aıtsaq, osy jyldyń 1 shildesinen bastap Biryńǵaı jınaqtaýshy zeınetaqy qorynda (BJZQ) eńbek sińirgen jyldary boıynsha jınaǵy bar zeınetkerlerge turǵyn úı jaǵdaıyn jaq­sartýǵa nemese emdelýge zeınet­aqy jınaǵynyń barlyq somasyn paıdalanýǵa quqyq beriledi. Bul bastama bıyl qabyldanǵan Áleýmettik kodeks aıasynda júze­ge asyrylady.

Eńbek jáne halyqty áleýmet­tik qorǵaý mınıstrliginiń habarlaýynsha, shildeden bastap zeınetkerler www.enpf-otbasy.kz ınternet-platformasy arqyly BJZQ-da jınalǵan qarajatyn turǵyn úı jaǵdaılaryn jaqsar­týǵa paıdalaný úshin birjolǵy zeınetaqy tólemderin alýǵa «Ot­ba­sy bank» turǵyn úı qurylys jınaq banki» AQ nemese ekinshi deńgeıdegi bank­terge júgine ala­dy. Al emde­lý maqsatynda bir­jol­ǵy zeınet­aqy tólemderin paı­dalaný úshin joǵaryda kórse­til­gen platforma arqyly «Otba­sy bankine» ótinish berý qajet.

Buǵan deıin 2021 jyldyń 1 qań­tarynan bastap BJZQ aza­­mattarǵa zeınetaqy jına­ǵy­­n­yń bir bóligin turǵyn úı jaǵ­­daıyn jaqsartý nemese emde­lý­ge aqy tóleý sııaqty áleý­met­­­t­ik maq­sattarǵa jumsaý qu­qy­­ǵy beril­geni belgili. Osy oraı­da atal­ǵan quqyqty qandaı sanat­taǵy azamattar paıdalana alatyny­na toqtalyp óteıik. Birin­shiden, bul – BJZQ-da zeı­net­aqy jı­naǵy bar jumys isteı­tin azamat­tar. Olar «tómengi jet­ki­liktilik sheginen» asatyn soma­nyń bir bóligin paıdalana alady. Ekinshisi – zeınetaqysy joǵalǵan tabys somasynyń (buryn alǵan jalaqy­synyń) keminde 40%-yn quraıtyn zeınetkerler. Olar BJZQ-da qalǵan zeınetaqy jı­naqtary somasynyń 50%-yna deıin paıdalana alady. Al úshin­shisi – ózine zeınetaqy annýı­tetin resimdegen jáne áli de jınaǵy bar azamattar. Olar BJZQ-da qal­­ǵan zeınetaqy jınaqtarynyń soma­sy sheginde paıdalana alady. Bul norma jumys isteıtin azamattardy da, zeınetkerlerdi de qamtıdy.

Sonymen qatar Áleýmettik kodeks aıasynda 2023 jyldyń 1 shil­desinen bastap BJZQ salymshylaryna zeınetaqy jınaǵy somasynyń 50%-yna deıin óziniń derbes tańdaýy boıynsha jeke basqarýshy ınvestısııalyq kom­­panııalarǵa berý quqyǵy beri­­le­di. Bul azamattarǵa zeı­net­aqy aktıvterin basqarýǵa qatysýǵa, ózderiniń zeınetaqy jospa­ryn qurýǵa, jınaqtaryn ınves­tı­sııalaýdyń balama saıasatyn tań­daýǵa múmkindik beredi.

Jınaqtardy jeke basqarý­ǵa berý kezinde ártúrli ınves­tı­sııa­lyq strategııalardy paıdalaný salymshylardyń táýekelderin árta­raptandyrýǵa, neǵurlym joǵa­ry ınvestısııalyq tabys alý­ǵa jáne tıisinshe zeı­net­aqy jınaqtarynyń ulǵaıýy­na yq­pal etedi. Salymshy zeı­net­aqy jınaqtaryn jeke basqarý­shy kom­panııaǵa aýdarǵan kezde onyń jınaqtaryn basqa basqa­rý­shy kompanııaǵa aýdarý nemese Ult­tyq banktiń, ıaǵnı BJZQ-nyń bas­qarýyna qaıtarý quqyǵy saqtalady.

Memleket Ulttyq banktiń bas­qarýyndaǵy, ıaǵnı BJZQ-da­ǵy jınaqtar boıynsha ǵana zeı­netaqy jınaqtarynyń saq­ta­lýyna kepildik beredi. In­ves­tısııalyq portfeldi basqa­rýshynyń (IPB) basqarýyna beriletin zeınetaqy jınaqtary­nyń saqtalýyna salymshy tań­daǵan IPB jaýapty bolady. Jyl qorytyndysy boıynsha IPB alǵan nomınaldy tabys pen zeınetaqy aktıvteri tabys­tylyǵynyń eń tómengi máni arasyndaǵy teris aıyrma týyn­daǵan jaǵdaıda osy basqa­rýshy kompanııa atalǵan aıyrmany salymshyǵa óz qarajaty esebinen óteýge mindetti.

Osy oraıda zeınetaqy jınaq­taryn senimgerlik basqarýǵa berý úshin salymshylardyń BJZQ-ǵa júginýi qajet ekenin atap ótý kerek.