«Qazgıdromet» RMK boljaýynsha, bıylǵy jaz maýsymy jyldaǵydan ystyq bolady. Ásirese, elimizdiń batysy men shyǵysynda jáne ońtústiginde aptap ystyq kópke deıin saqtalady. Iаǵnı, sýǵa baryp demalýshylardyń sany da arta túseri sózsiz.
«Jaz endi bastaldy, al elimizdiń sý aıdyndarynda qaza tapqandardyń sany ulǵaıyp barady. Tótenshe jaǵdaılar mınıstrliginiń málimeti boıynsha jazdyń birinshi kúni ǵana 4 adam sýǵa ketip, qaıtys boldy. Aldyńgúni bir kúnde 9 adam, keshe taǵy 4 adam sýǵa ketken. Qaıǵyly jaǵdaılardyń barlyǵy shomylýǵa ruqsat etilmegen jerlerde oryn alǵan. Bul – shynymen de alańdatarlyq jaǵdaı», dedi Álıhan Smaıylov.
Qazirgi ýaqytta shomylý maýsymyna daıyndyq jumystary jalǵasyp jatyr. О́ńirlerde shomylýǵa qajetti arnaıy oryndar jabdyqtalyp, jańadan jaǵajaılar salynyp jatyr. Sondaı-aq qaýipsizdik sharalaryn saqtaýǵa qatysty profılaktıkalyq jumystar da júrgizilýde.
Úkimet basshysy respýblıkada jyl saıyn 300-ge jýyq adam sýǵa ketip, qaıtys bolatynyn, olardyń 100-ge jýyǵy balalar ekenin aıtty. Bul qabyldanyp jatqan sharalardyń jetkiliksiz ekenin kórsetedi.
«Abaı, Jetisý, Ulytaý oblystarynda osy ýaqytqa deıin shomylýǵa ruqsat etilgen arnaıy oryndar belgilenbegen. Al Qyzylorda oblysynda búkil óńir halqy úshin arnaıy belgilengen 4-aq oryn bar. Almaty oblysynda Qapshaǵaı sý qoımasynyń mańyndaǵy kóptegen jeke menshik jaǵajaılar resmı tirkelmegen», dedi Premer-mınıstr.
Osyǵan baılanysty óńir ákimdikterine Tótenshe jaǵdaılar mınıstrligimen birlesip, sýǵa shomylýǵa arnalǵan qaýipsiz oryndardy belgileý jónindegi jumysty kúsheıtý, sondaı-aq qaýipsizdik sharalary týraly halyqty belsendi túrde habardar etip otyrý tapsyryldy.
Sonymen qatar Úkimet basshysy profılaktıkalyq jumystar negizinen qalalar men aýdandarda ǵana júrgiziletinin aıtyp ótti. Aýyldyq jerlerde buǵan kóńil bólinbeıdi.
«Sol sebepti sýǵa batqandardyń basym kópshiligi, ıaǵnı 60-70%-y aýyl turǵyndary bolyp otyr. Osy baǵytta jergilikti jerlerde aýqymdy jumystar júrgizý qajet. Sýdaǵy qaýipsizdik talaptaryn, alǵashqy kómek kórsetý erejelerin, arnaıy jaǵajaılar men qaýipti oryndar týraly aqparatty halyqqa únemi jetkizý kerek», dedi Álıhan Smaıylov.
Odan bólek Premer-mınıstr ońtústik óńirlerdegi sýarý kanaldary da adamdarǵa qaýip tóndirip otyrǵanyn aıtty. Olardyń kóbi qorshalmaǵan.
«Bul – birinshi kezekte balalar úshin óte qaýipti. Kanaldarda balalar ólimi kóp jaǵdaıda Almaty, Jambyl, Qyzylorda jáne Túrkistan oblystarynda tirkeledi. Bul rette Túrkistan oblysynyń oń tájirıbesin atap ótkim keledi. Onda aryqqa túsip, qulap ketken jaǵdaıda óz betinshe syrtqa shyǵýǵa múmkindik beretin arnaıy quraldar ornatylyp jatyr. О́ńir ákimdikteri osy tájirıbeni zerdelep, kanaldar men aryqtarda qaýipsizdikti qamtamasyz etý máselesin pysyqtaýy qajet», dedi Álıhan Smaıylov.
