«Arnaıy gobo-proektorlardyń kómegimen avtokólik júrgizýshileri men jaıaý júrginshiler joldaǵy aq-sary jolaqtardy anyq kóre alady. Proeksııa júrgizýshilerge joldan ótip bara jatqan adamdardy 100-150 metr qashyqtyqta ýaqtyly baıqaýǵa múmkindik beredi», dep túsindirdi kompanııanyń resmı ókili Lázzat Stamǵazıeva.
Zamanaýı tehnologııa Almaty óńirinde ornalasqan respýblıkalyq mańyzy bar tasjoldarda paıda bolǵanyn aıta ketý kerek. Bes jańa proeksııalyq jolaqtar eldi mekenderdiń, oqý oryndarynyń jáne medısınalyq kómek kórsetý pýnktteriniń qasyna ornatylǵan. Olar:
- A-2 «О́R shekarasy (Tashkentke) - Shymkent - Taraz - Almaty - Qorǵas» tasjolynyń 29 shaqyrymynda (Qarasaı aýdany, Barys avtobazarynyń janynda);
- A-4 «Almaty - Shamalǵan - Uzynaǵash - Aqqaınar - Suranshy batyr - QR shekarasy» tasjolynyń 52 shaqyrymynda (Jambyl aýdany, Qarǵaly kentiniń janynda);
- M-36 «RF shekarasy (Ekaterınbýrgke) - Almaty» avtojolynyń 40 shaqyrymynda (Qarasaı aýdany, Qoshmambet kentiniń janynda);
- A-2 «О́R shekarasy (Tashkentke) - Shymkent - Taraz - Almaty - Qorǵas» tasjolynyń 24 shaqyrymynda (Talǵar aýdany, Panfılov kentiniń mańynda);
- R-17 «Almaty - Talǵar - Báıdibek bı» tasjolynyń 15 shaqyrymynda (Talǵar aýdany, Belbulaq kentiniń janynda) ornatyldy.
Buǵan deıin dál osyndaı 30-ǵa jýyq proeksııalyq jolaq eldiń toǵyz óńirinde ornatylǵan edi.
