«Qurmetti dostar! Qala turǵyndary! Qaladaǵy aýyz sý tapshylyǵy osy aıdyń sońyna deıin sheshiledi. Degenmen dál qazirgi ýaqytta keıbir turǵyn úılerde sýdyń azdyǵy shamadan tys qatty baıqalatynyn túsinip otyrmyz. Mundaı úılerdiń máselesin «Astana Sý Arnasy» jáne aýdandyq ákimdikter birlesip sheship jatyr. Keıbir jerlerde úıdiń nasostary qaıta bekitilip, sonyń arqasynda sýdyń aǵysy kúsheıtilip jatyr. Biraq ol barlyq jaǵdaıda birdeı kómektese bermeıdi», dedi Dáýren Babamuratov.
Onyń aıtýynsha, «Astana Sý arnasy» barlyq turǵyn úılerge teńdeı qarap, sý tapshylyǵyn sheshýge barynsha tyrysyp jatyr. Alaıda sý qoımalarynda deńgeı qatty tómendep ketken kezde, sý qoımalaryn qaıta toltyrý úshin qaladaǵy aǵys azaıtylady. Ádette bul túnnen-tańǵa deıin jalǵasady.
«Mundaı kezde sabyr saqtaǵannan basqa eshteńe kómektese almaıtyny anyq. Sol sebepti qalyptasqan jaǵdaıǵa azamattardy túsinýshilikpen qarap, zańǵa qaıshy áreketterden aýlaq bolýǵa shaqyramyz. Kóshe jabylsa, sý keledi eken dep túsiný qate. Esesine, zańǵa qaıshy áreket, basqa azamattardyń erkine nuqsan keltirip, jol-kólik apatyna ákelýi yqtımal», dep túsindirdi Ishki saıasat basqarmasynyń basshysy.
Bul rette Dáýren Babamuratov qalyptasqan jaǵdaıǵa qatysty árbir aryz-shaǵym tolyq qaralatynyn qosa aıtty.
«Tolyqqandy sý tapshylyǵy qurylysy 2021 jyly bastalǵan sý tazalaý stansııasy iske qosylǵan kezde, ıaǵnı osy maýsymnyń 30-nan keıin sheshiledi. Sonymen qatar kelesi aptada Astana sý qoımasynan taǵy bir qubyr sý stansııasyna jiberiledi. Bul da sý tapshylyǵynyń sheshilýine kómektesedi», dep túıindedi spıker.
