Erasmus+ jobasy aıasynda Eýroodaqtyń 5 ýnıversıteti jáne Orta Azııa memleketteriniń 12 joǵarǵy oqý orny sý resýrstaryn basqarý jáne sý dıplomatııasy salasynda kásibı quzyrettilikti arttyrý maqsatynda yntymaqtastyq ornatady.
«Ortalyq Azııadaǵy klımattyq ózgeristerge tózimdilikti kúsheıtý jáne qaýipsizdikti arttyrý maqsatynda sý sektorynda joǵary bilimdi nyǵaıtý» jónindegi Erasmus+ jobasyn júzege acyrýdyń basty maqsaty – sý sektory salasyndaǵy ózekti máselelerdi sheshý úshin Orta Azııa memleketterinde adamı kapıtaldy kúsheıtý. Bul maqsatty júzege asyrý úshin jańa oqý baǵdarlamalary engiziledi, sondaı-aq burynnan bar baǵdarlamalar ınnovasııalyq elementtermen tolyqtyrylady. Jańartylǵan jáne jańa baǵdarlamalarda krıtıkalyq oılaý, akademııalyq mátindermen jumys isteý, ınteraktıvti oqytý syndy elementter qarastyrylady. Sonymen qatar sý dıplomatııasyn (water diplomacy) dıplomatııanyń jańa, mamandandyrylǵan salasy retinde damytýǵa erekshe kóńil bólinedi», dedi Memlekettik basqarý akademııasynyń vıse-rektory Margarıta Kadyrova.
Onyń aıtýynsha, bul joba aıasynda sý sektory salasyndaǵy ózekti máselelerdi sheshý úshin basqarýshylardyń jańa býynyn daıarlaý, Orta Azııa memleketteriniń arasyndaǵy yntymaqtastyqty arttyrý, oqytýshy quramnyń biliktiligin kóterý, bilim alýshylar men oqytýshylar arasynda mobıldilikti arttyrý, ǵylymı zertteýlerdi qoldaý syndy maqsattar da kózdelgen.
Jobany júzege asyrýda joǵary oqý oryndarynyń róli erekshe bolmaq, sonymen qatar qarastyrylyp otyrǵan másele boıynsha memlekettik organdar, azamattyq qoǵam jáne jeke sektordyń birlesip jumys isteýine erekshe nazar aýdarylmaq.
2023 jyldyń 6-7 maýsym aralyǵynda Qyrǵyzstan Respýblıkasy Syrtqy ister mınıstrliginiń Dıplomatııalyq Akademııasynda ótken alǵashqy kezdesýge Eýroodaq jáne Ortalyq Azııanyń joǵarǵy oqý oryndarynyń ókilderimen qatar, Eýroodaqtyń Qyrǵyzstandaǵy mıssııasynyń basshysy, Qyrǵyzstannyń Bilim jáne ǵylym vıse-mınıstri, Qyrǵyzstannyń Syrtqy ister vıse-mınıstri, sondaı-aq Orta Azııa memleketteriniń dıplomatııalyq mıssııasynyń ókilderi qatysty.
