Negizgi UBT bastalǵannan beri 127 myń retten astam test tapsyryldy. Onyń ishinde talapkerlerdiń 74 paıyzy qazaq tilinde, 26 paıyzy orys tilinde, 0,1 paıyzy aǵylshyn tilinde testileýden ótti.
UBT bastalǵaly shekti baldy 78 paıyzǵa jýyq talapker jınady. Ortasha balǵa keletin bolsaq, ol 69 baldy qurady. Eń joǵary ball – 137, ony testileýdiń birinshi aptasynda bir talapker jınaǵan.
«UBT-nyń úshinshi aptasynda talapkerler testileýdi tapsyrýdyń ekinshi múmkindigin paıdalanýda. Sondyqtan testti eki ret tapsyryp, baldaryn bilip otyrǵan balalar grant konkýrsy boıynsha suraqtar qoıa bastady. Eń jıi qoıylatyn suraq: «grant utyp alý úshin qansha ball jınaý kerek?» Grantqa shekti ball degen bolmaıdy jáne barlyǵy konkýrsqa baılanysty ekendigin taǵy da bir atap ótsem. Biraq kem degende baǵdar bolý úshin oqýǵa túsýshiler byltyrǵy nátıjelermen tanysa alady. Mysaly, 2022 jyly «Stomatologııa» BBT boıynsha bir granttyq orynǵa 25 úmitker bolǵan, al grant utyp alǵandardyń ortasha kórsetkishi 134 baldy qurady», dep atap ótti QR ǴJBM Ulttyq testileý ortalyǵynyń dırektory Rýslan Emelbaev.
Mınıstrliktiń málimetine sáıkes, erekshe bilim berý qajettilikteri bar oqýǵa túsýshiler úshin qolaıly jaǵdaı jasaýdyń arqasynda UBT-ǵa eki aptanyń ishinde 370 talapker qatysqan.
146 talapker smartfon, shpargalka jáne basqa da tyıym salynǵan zattardy alyp ótý áreketi saldarynan test tapsyrý múmkindiginen aıyryldy. Testileý kezinde erejelerdi buzǵany úshin aýdıtorııadan 106 adam shyǵarylyp, olardyń nátıjeleri joıyldy. Bógde tulǵalar anyqtalǵan joq.
2023 jylǵy UBT aıaqtalǵannan keıin kúntizbelik jyldyń 31 qazanyna deıin testileýdiń beınejazbalaryna taldaý júrgiziledi. Tyıym salynǵan zattardy paıdalaný nemese erejelerdi buzý faktileri anyqtalǵan jaǵdaıda túsýshiniń UBT nátıjeleri joıylady.
