Jambyl oblysynyń turǵyny Marat Aıýbaev órt sóndirý mashınasyn oılap tapqanyn alǵa tartyp, Tótenshe jaǵdaılar mınıstrliginiń tabaldyryǵyn tozdyrǵanyna da talaı jyldyń júzi bolǵanyn «Egemen Qazaqstan» gazetiniń tilshisi Tabıǵat Musylmanqulǵa bergen suhbatynda aıtty.
M. Aıýbaevtyń aıtýynsha, ol oılap tapqan órt sóndirý mashınasy táýlik boıy damylsyz jumys isteıtin kórinedi. Bılik tarapynan qoldaý bolsa, jobasyn aıaǵyna deıin jetkizýge daıyn.
«Tilsiz jaýdan keletin tragedııa týraly sóz qozǵaǵanda órt sóndirý tehnıkalary týraly aıtpaı ketýge bolmas. Men oılap tapqan tehnıka álem elderiniń eshbirinde joq. Jahan jurty paıdalanyp otyrǵan tehnıka á degende jarty saǵat qana jumys isteıdi. Olardyń barlyǵy derlik órtti sýmen óshiredi. Al men oılap tapqan órt sóndirý mashınasy bir qýattaǵan soń 24 saǵat damylsyz órt sóndire alady», deıdi ónertapqysh.
Jobasy shynynda da órshigen órtti jedel sóndirýge qaýqarly kórinedi. О́ıtkeni qazirgi tehnıkalar bir ǵana tásilmen jumys istese, M. Aıýbaevtyń órt sóndirý mashınasy jeti tásilmen tótenshe jaǵdaıdy aýyzdyqtaı alady eken.
О́nertapqysh azamat jańalyǵynyń Úkimet tarapynan qoldaý tappaı kele jatqanyna kúıinedi. Alaıda áli úmiti óshken joq. Tilsiz jaý tyǵyryqqa tiregen kezde bılik basyndaǵylar onyń jobasyna oń kózben qaraıtynyna senedi.
