Májilis depýtaty Erbolat Saýryqovtyń aıtýynsha, ótken jyly Qorǵanys mınıstrligi áskerı qyzmettiń bedelin arttyrý jumystaryna bastamashy boldy. Atap aıtqanda, Qazaqstannyń Qarýly Kúshteri, basqa da áskerleri men áskerı quralymdary qatarynda merzimdi áskerı qyzmettiń belgilengen merzimin ótegen azamattarǵa áleýmettik qoldaý paketi usynyldy. Sonyń bir baǵyty – olarǵa bilim berýde jeńildikter qarastyrý.
– Birinshiden, qyzmet aıaqtalǵannan keıin eki jyl ishinde UBT tapsyrmaı aqyly negizde, al jaýyngerlik joǵary nátıje kórsetken azamattar JOO esebinen tegin qabyldanady. Sonymen qatar olardy Qorǵanys mınıstrliginiń áskerı oqý oryndaryna emtıhandarsyz qabyldaý kózdelgen, – dedi Qorǵanys mınıstriniń orynbasary Sultan Kamaletdınov.
Ǵylym jáne joǵary bilim mınıstrligi Joǵary jáne joǵary oqý ornynan keıingi bilim komıteti tóraǵasynyń orynbasary Nurbek Saparhodjaev qazirgi tańda 76 joǵary oqý orny bastamany qoldap, eń laıyqty áskerı qyzmetkerge óz qarajaty esebinen granttar bólý týraly kelisimge qol qoıǵanyn atap ótti. Shamamen 3 myńǵa jýyq grant bólingen. Qarjy naryǵyn retteý jáne damytý agenttigi tóraǵasynyń birinshi orynbasary Nurlan Ábdirahmanov Qorǵanys mınıstrligimen ózara yntymaqtastyq týraly memorandým aıasynda banktik qaryzdar men shaǵyn nesıeler boıynsha tólemderdi keıinge qaldyrý jóninde múddeli taraptardyń tıisti is-qımyl algorıtmi ázirlengenin aıtty.
Búgingi tańda 3700 áskerı qyzmetkerdiń 5500 qaryz ben shaǵyn nesıe boıynsha tólemderi keıinge qaldyrylǵan. Talqylaý barysynda májilismen Aıdos Sarym merzimdi áskerı qyzmetshilerge joǵary oqý oryndaryna grantqa túserde kvota bólýdi zańmen belgileýdi usyndy.
– Qarjy mınıstrliginiń málimetinde UBT-dan ótpeı joǵary jáne joǵary oqý ornynan keıingi bilim berý baǵdarlamalary boıynsha áskerı qyzmet ótkergen azamattarǵa oqýǵa konkýrstan tys granttar berý talapkerlerdiń basqa sanattaryna qatysty teńsizdik týǵyzatyny kórsetilgen. Alaıda jaqynda Úkimet pen Joǵarǵy aýdıtorlyq palatanyń 2022 jylǵa arnalǵan respýblıkalyq bıýdjettiń atqarylýy týraly esepterin talqylaý barysynda 18 myń bilim granty ıgerilmeı qalǵany aıtyldy. Bul úlken somalar ǵoı, nege biz áskerı qyzmetkerlerge kvota qosa almaımyz? – dedi Aıdos Sarym.
– Qorǵanys mınıstrliginiń bastamasyn depýtattar men memlekettik organdar qoldaıdy dep oılaımyn. Pılottyq joba úshin alǵys bildiremiz, ony ári qaraı damytý kerek. Osy jáne basqa da jeńildikter zańnamalyq qoldaýdy qajet etedi, – dep qorytyndylady talqylaýdy komıtet tóraıymy Aıgúl Quspan.
Otyrys barysynda aıtylǵan usynystar negizinde bul baǵyttaǵy jumystar jalǵasady.
