«Elimiz úshin strategııalyq mańyzy bar taǵy bir másele – shekaralas aımaqtardy damytý. Jer – basty baılyǵymyz. Týyńdy tiger toqymdaı jeriń bolmasa, óz memleketiń de bolmaıdy. Babalarymyz bizge ulan-ǵaıyr aýmaqty mıras etti. Ony shashaý shyǵarmaı saqtap, kórkeıtý – bizdiń qasıetti boryshymyz. Osy oraıda, «Jerimiz sheteldikterge satylyp jatyr» degen sóz ara-tura aıtylyp jatady. Bul – jalǵan aqparat. Elimizde jerge qatysty túbegeıli sheshim áldeqashan qabyldanǵan. Ol sheshim zańmen birjola bekitilgen. Túrli daqpyrtqa senip, jurtty dúrliktiretin jalǵan aqparat taratýdy doǵarý kerek. Biz babalar amanatyna árdaıym adal bolamyz. Sheteldikterge qazaqtyń bir qarys jerin de, bir ýys topyraǵyn da bermeımiz. Ony kózdiń qarashyǵyndaı saqtaımyz. Shekara mańyndaǵy eldi mekenderdiń ahýaly jerimizdiń tutastyǵyna jáne elimizdiń amandyǵyna tikeleı yqpal etedi», deı kele Prezıdent shyn máninde, bul – strategııalyq mańyzy bar másele ekenin aıtty.
Budan soń, Memleket basshysy shekara shetindegi keıbir eldi mekende halyq sany kúrt azaıyp ketkenin aıtty. Buǵan bir kezdegi aýdandardy biriktirý jónindegi sheshimder de yqpal etkeni sózsiz.
«Oblystardyń ishki aýmaqtyq-ákimshilik qurylymynda oılanatyn tustar bar. Biz byltyr Abaı, Ulytaý jáne Jetisý oblystaryn qurdyq. Bul sheshim aımaqtardyń damýyna tyń serpin berdi. «Amanat» partııasy birqatar shekaralas aýdandy qalpyna keltirý týraly bastama kótergenin bilesizder. Úkimet meniń tapsyrmammen bul máseleni pysyqtady. Men soǵan sáıkes Qaton-Qaraǵaı, Marqakól jáne Maqanshy aýdandaryn qalpyna keltirý týraly negizgi sheshimdi qabyldadym. Árıne, buǵan arnaıy daıyndyq kerek. Qajetti esep-qısabyn jasap, qarajatymyzǵa, bıýdjettiń múmkindigine qaraýymyz kerek. Tıisti jumystyń bárin bıyl aıaqtap, aldaǵy eki jyldyń ishinde osy úsh aýdandy qalpyna keltire bastaımyz. Bul – ulttyq qaýipsizdikti qamtamasyz etý turǵysynan qarasaq ta, óte mańyzdy másele. Osy máseleni kópke sozbaı, sheshýimiz qajet», dedi Q.Toqaev.
Sonymen qatar Prezıdent aýdandardy qosý nemese taratý ondaǵy jurttyń kúndelikti ómirine tikeleı áser etetindigin, sheshim qabyldaǵan kezde halyq sany, ekonomıkalyq áleýeti, ınfraqurylymy túgel eskerilý kerektigin atap ótti. Memleket basshysy aımaqtardy, onyń ishinde aýyldy órkendetý isine erekshe mán beretindigin aıtty. Byltyr Prezıdent saılaýynan keıin eń aldymen aýyldy damytý máselesine arnalǵan Jarlyqqa qol qoıǵanyn eske saldy.
«Sondaı-aq Úkimet aldaǵy 5 jylda aýyldy damytýǵa aıryqsha kúsh salady. Elge eńbegi sińgen kórnekti tulǵalardyń basym kópshiligi aýyldan shyqqan. Biz elimizdi órkendetemiz desek, aýyl mektebiniń jaı-kúıin jaqsartýdy myqtap qolǵa alýymyz kerek. Bul jumysty «Aýyl – el besigi» arnaıy jobasynyń aıasynda keshendi túrde júzege asyryp, ıaǵnı, mektep salý, kúrdeli jóndeý júrgizý jáne ony jabdyqtaý jumysyn tıisti deńgeıde atqarý mańyzdy», dedi el Prezıdenti.
