Dostyq sıpattaǵy kezdesý Qurmet qaraýyl rotasynyń qatysýymen ótti. Áskerı orkestrdiń oryndaýynda eki eldiń memlekettik ánurany oryndaldy.
Qazaqstan Respýblıkasy Ishki ister mınıstriniń orynbasary – Qazaqstan Respýblıkasy Ulttyq ulanynyń Bas qolbasshysy general-leıtenant Erkin Botaqanov qurmetti qonaqtardy jyly qarsy alyp, Qazaqstan quqyqtyq tártip áskerleriniń jaýyngerlik qyzmetimen jáne atqaratyn mindetterimen tanystyrdy.
Taraptar Qazaqstan Respýblıkasynyń Ulttyq ulany men Tájikstan Respýblıkasy Ishki áskerleriniń quqyq qorǵaý jáne bilim berý salalaryndaǵy yntymaqty damytý joldaryn talqylady. Sondaı-aq vedomstvolar arasyndaǵy memorandýmǵa qol qoıý jaǵdaılaryn naqtylady.
«Mártebeli qonaqtarymyzǵa Akademııamyzdyń jas ofıserleriniń oqý bitirýine oraı Qazaqstanǵa kelgenderi úshin alǵys aıtqym keledi. Bıyl Tájikstan Respýblıkasynan kelgen 10 kýrsant leıtenant shenin ıelenip, oqýyn aıaqtaıdy. Jalpy, Qazaqstan Respýblıkasy Ulttyq ulan Akademııasynyń túlekteri suranysqa ıe ekenin atap ótemin. Mysaly, bıyl bes leıtenant Memlekettik kúzet qyzmeti bastyǵynyń qaramaǵyna ótti, úsheýi – QR Tótenshe jaǵdaılar mınıstriniń qaramaǵyna jáne belgili bir talaptardan ótken 13 jas ofıser Qazaqstannyń ishki ister organdarynyń arnaıy maqsattaǵy bólimshelerine jiberildi», dep atap ótti Ulttyq ulannyń Bas qolbasshysy general-leıtenant Erkin Botaqanov.
Kezdesý barysynda general-maıor Sýhrob Raýfzada delegasııa múshelerin tanystyryp, jyly shyraıda qabyldaǵany úshin alǵysyn bildirdi. Sonymen qatar Qazaqstan Ulttyq ulanynyń Bas qolbasshylyǵyn Tájikstan Respýblıkasyna resmı túrde shaqyrdy.
«Bas qolbasshy – general-leıtenant Erkin Sovetbekuly Botaqanov bastaǵan Ulttyq ulan basshylyǵyna Qazaqstanǵa jumys saparymen kelýge múmkindik jasaǵany úshin alǵysymdy bildiremin. Memleketaralyq kelisimderge sáıkes bizdiń kýrsanttar Qazaqstan Respýblıkasy Ulttyq ulan akademııasynda oqıdy jáne 2013 jyldan bastap jyl saıyn Tájikstan Respýblıkasy IIM Ishki áskerleriniń qataryn tolyqtyrady. Rotalyq quramnyń komandırlik býyny tolyǵymen derlik Petropavl áskerı joǵary oqý ornynyń túlekterinen quralǵanyn atap ótemin. Olardyń arasynda polk komandırleriniń orynbasarlary laýazymdarynda qyzmet atqaratyndar da bar», dedi general-maıor Sýhrob Raýfzada.
Osydan keıin qurmetti qonaqtarǵa Áskerlerdi basqarý ortalyǵynyń jumysy kórsetildi. Sodan soń qonaqtar dástúr boıynsha Bas qolbasshylyqtyń alleıasyna aǵash otyrǵyzdy.
Budan keıin delegasııanyń jumys sapary 5573 áskerı bóliminde jalǵasty. Onda meımandar elordalyq jedel brıgadanyń jaýyngerlik qyzmetimen jáne «Úrker» turǵyn alabyndaǵy áskerı qalashyqtyń ınfraqurylymymen tanysty.
Aıta keteıik, Tájikstannan kelgen delegasııa 17 maýsym kúni Petropavl qalasynyń bas alańynda ótetin QR Ulttyq ulany Akademııasynyń jas ofıserlerine dıplom tabystaý is-sharasyna qatysady.
