Indýstrııa jáne ınfraqurylymdyq damý vıse-mınıstri Ilııas Ospanovtyń málimetine súıensek, jeńildetilgen avtonesıe baǵdarlamasy qaıta formattalady. Endi bul avtobýs satyp alý úshin óńirlerge nesıe berý baǵdarlamasy bolmaq.
«Jeńildetilgen avtonesıege bólingen 100 mıllıard teńgeniń barlyǵy ıgerildi. Jyl basynan beri aldymyzda osy qarjyny odan ári damytý, ıgerý mindeti tur. Sońǵy ýaqytta óńirlerdi avtobýstarmen qamtý máselesi jıi kóterilip jatyr. Búginde qalalardaǵy avtobýstardyń 46 paıyzy eskirgen. Jergilikti atqarýshy organdarmen kezdesýler ótkizip, barlyq qajettilikterdi eskerdik. Búgin 2 000 avtobýsqa tapsyrys berildi. Olardyń teń jartysy Almaty qalasynyń ákimdiginen kelgen, bul úlken megapolıste tapshylyq joǵary ekenin bildiredi», dedi vıse-mınıstr.
Ilııas Ospanov Qazaqstanda jeńildetilgen avtonesıe berýdiń eki baǵdarlamasy bar ekenin eske saldy. Endi olardyń tek bireýi qaıta formattalady.
«Bizde avtokólikti nesıelendirýdiń eki baǵdarlamasy bar. Birinshi baǵdarlama - Qazaqstannyń Damý banki arqyly, ekinshisi - Kásipkerlikti damytý qory, О́KM qarjysy esebinen júrgiziledi. Dál qazir ol qaıta formattalady, qarajat aımaqtarǵa baǵyttaldy. Al Qazaqstannyń Damý banki aıasyndaǵy baǵdarlama ózgerissiz qaldy», dedi vıse-mınıstr.
