Áskerı keńeste QR Ishki ister mınıstriniń orynbasary – Ulttyq ulannyń Bas qolbasshysy general-leıtenant Erkin Botaqanov tóraǵalyq ótti.
Otyrysqa Ulttyq ulannyń óńirlik qolbasshylyqtarynyń qolbasshylary, áskerı bólim komandırleri men olardyń orynbasarlary qatysty.
Kún tártibine 2023 jyldyń birinshi jartyjyldyǵyndaǵy qyzmettik-jaýyngerlik is-áreketin qorytyndylaý jáne aldaǵy kezeńderge arnalǵan mindetterdi aıqyndaý máseleleri qaraldy. Bas qolbasshy Ulttyq ulannyń aýqymdy jumystaryna toqtalyp, bıylǵy mamyr aıynda ótken Búkilarmııalyq keńes kezinde QR Prezıdenti – Qarýly kúshterdiń Joǵarǵy Bas qolbasshysy Qasym-Jomart Toqaev bekitken tapsyrmalardyń oryndalýy jóninde sóz qozǵady.
Is-shara barysynda Ulttyq ulan Bas qolbasshysynyń birinshi orynbasary – Bas shtab bastyǵy general-maıor Qaırat Aqtanov Ulttyq ulannyń avıasııasy, qyzmettik-jaýyngerlik is-áreketin uıymdastyrý, arnaıy maqsattaǵy bólimsheler, tehnıkamen qamtý, tyldyq qamtamasyz etý sharalary, strategııalyq qujattar, kadrlyq jumystar, sporttyq jetistikter sekildi jumystar jóninde baıandama jasady. Onyń aıtýynsha, ulandyq jaýyngerlerdiń patrýldik-bekettik qyzmeti barysynda barlyǵy 978 tapsyrma oryndalǵan. Sonymen qatar sarbazdar aýqymdy deńgeıdegi 96 is-sharanyń ótýine atsalysyp, 2 742 quqyqbuzýshyny quryqtaǵan.
Sondaı-aq Áskerı keńes aıasynda «Ortalyq» óńirlik qoblasshylyǵy uıymdastyrǵan jedel daıarlyq boıynsha Ulttyq ulan Bas qolbasshysynyń orynbasary general-maıor Baýyrjan Ábjanov sóz sóıledi. Al Ulttyq ulan Bas tárbıeshisi general-maıor Qaırat Úmbetov 6506 áskerı bóliminde ótkizilgen keshendi toptyń jumys nátıjeleri boıynsha baıandama jasady. Sonymen qatar óńirlik qolbasshylyq qolbasshylary men keıbir áskerı bólim basshylaryna sóz berildi.
Jıyn barysynda Bas qolbasshy baǵynystaǵy bólinisterindegi kemshilikteri úshin keı komandırlerge aýyzsha eskertý jasasa, endi birin úzdik nátıjeleri úshin joǵary komandırlik laýazymǵa taǵaıyndady. Ásirese, qyzmettik-jaýyngerlik árekette joǵary nátıje kórsetken komandırlerge sheksiz alǵysyn bildirdi. Sonymen qatar áskerı qyzmetshilerdiń moraldyq-psıhologııalyq jaı-kúıine, sondaı-aq áskerı ortada zańdylyq pen quqyqtyq tártipti saqtaý boıynsha sharalarǵa erekshe nazar aýdardy.
«Jarty jylda atqarylǵan jumystardyń nátıjesi jaman emes. Barlyq jaýyngerlik qyzmettiń tapsyrmalary oıdaǵydaı oryndaldy. Jumystar sapaly atqarylǵan. Jaýyngerlikqyzmet pen áskerı daıarlyqtar da udaıy júrgizilip otyr. Tyldyq qamtamasyz etý, qarý-jaraq pen tehnıka jaǵynan alyp qarasaq ta eleýli ózgeris bar. Mundaı oń ózgerister áli de bolady. Sondyqtan ózderińizge júktelgen tapsyrmalardy asqan jaýapkershilikpen oryndaısyzdar dep senemi», dedi Ulttyq ulannyń Bas qolbasshysy general-leıtenant Erkin Botaqanov.
Áskerı keńestiń sońynda jaýyngerlik qyzmet pen jaýyngerlik daıarlyqtyń jáne áskerı bólimdegi zańdylyq pen tártiptiń nátıjesi boıynsha úzdik dep tanylǵan áskerı bólimderdiń komandırleri marapattaldy.
Al shaǵyn fýtbol men 100 metr qashyqtyqta sýǵa júzýden uıymdastyrylǵan sporttyq saıysta jeńiske jetken ofıserlerge madaqtama kaǵazy men medaldar, kýboktar tabystaldy.
Áskerı keńes otyrysynyń qorytyndysy boıynsha basshylyq etý jáne oryndaý úshin óńirlik qolbasshylyqtar men áskerı bólimderge jiberiletin qaýly qabyldandy.
Aıta keteıik, Áskerı keńestiń kezekti keńeıtilgen kóshpeli otyrysy «Ońtústik» óńirlik qoblasshylyǵynda ótedi dep josparlanǵan.
