Medıa mektep aqparattyq aǵymǵa ilese alatyn, zamanaýı talaptarǵa saı, qarymdy da qabiletti jýrnalısterdi daıarlaý maqsatynda uıymdastyrylyp otyr. Jobaǵa ár óńirden iriktelip alynǵan bakalavr, magıstrant dárejesindegi 50 stýdent qatysady.
Jazǵy mektep jýrnalısterdiń qabiletin shyńdap, bilimin tájirıbege aınaldyrýǵa úlken múmkindik beretini sózsiz. Sebebi jobada kásibı mamandar stýdentterge baǵdar berip, birigip jumys isteıdi.
Aıta keteıik, qatysýshylarǵa M.S.Nárikbaev atyndaǵy KazGIýÝ ýnıversıtetiniń Adjunct Assistant professory, PhD Alma Saılaýqyzy, rejısser, kınossenarıst Murat Esjan, M.S.Nárikbaev atyndaǵy KazGIýÝ ýnıversıtetiniń oqytýshysy Joldas О́risbaı, kásibı podkaster Eldar Qudaıbergenov jáne «Media 24» kompanııasynyń bas dırektory Marǵulan Aqan dáris oqyp, ýorkshop ótkizedi. 
Is-sharanyń ashylý saltanatyna QR Aqparat jáne qoǵamdyq damý mınıstrliginiń Azamattyq qoǵam isteri komıteti tóraǵasynyń orynbasary Perızat Sadýaqas, Qazaqstandyq qoǵamdyq damý ınstıtýtynyń Basqarma tóraǵasy Nurbek Matjanı qatysty.
Jýrnalıstıka - barlyq salanyń matory. Dál qazirgi aqparattyq qoǵamda onsyz eshteńe júzege aspaıdy. Sondyqtan jýrnalıst ashyq, sapaly ári saýatty saraptamalardy der kezinde usyna bilýi tıis. Nurbek Matjanı jýrnalıstıkanyń ár saladaǵy osyndaı mańyzyn tilge tıek etip, medıa mekteptiń maqsatyna toqtaldy.
«Media Bootcamp jazǵy mektebiniń oqý jospary teorııalyq bilimmen birge tájirıbelik jumystar arqyly kommýnıkatıvtik daǵdylar men kásibı oılaý qabiletin damytýǵa, sıfrly tehnologııalarǵa negizdelgen jańa ádis-tásilderdi meńgerýge baǵyttalǵan», dedi ol.
Jýrnalıstıka tehnologııanyń damýymen ózgeriske ushyrap jatyr. Aqparat taratýdyń jańa tásilderi kóbeıgen. Jýrnalısterge arnalǵan jazǵy mektep dál sol baǵyttarda jumys isteıtin bolady.
Media Bootcamp-tiń oqý baǵdarlamasy «Jasandy ıntellektiniń jýrnalıstıkaǵa áseri», «Jýrnalıstıka tarıhy: Álemdik jýrnalıstıkanyń damýy men erekshelikteri», «Jýrnalıstıkadaǵy zamanaýı ádis-tásilder», «Podkast: tujyrymdama, arhıtektýra, iske qosý», «Derekti fılm: ıdeıadan efırge deıin», «Digital First Content: áleýmettik jelige kontentti beıimdeý mehanızmi men erekshelikteri», «Jýrnalıstik etıka jáne standarttar» syndy zamanaýı baǵyttardy qamtıdy.
Qorqyt ata atyndaǵy Qyzylorda ýnıversıtetiniń 3-kýrs stýdenti Kárıma Jumaǵalıdiń aıtýynsha, Media Bootcamp – jýrnalıstıka salasyndaǵy bilimi men biliktiligin arttyrýǵa berilgen tamasha múmkindik.
«Sandyq medıa, mýltımedııalyq áńgimeler, áleýmettik medıa jáne derekter jýrnalıstıkasy týraly kýrstardy qamtıtyn is-sharanyń oqý jospary dál osy salalardaǵy daǵdylarymdy jetildirý úshin qajet», dedi qatysýshy.
Aıta keteıik, bul ıgi bastama QR Aqparat jáne qoǵamdyq damý mınıstrligi, Qazaqstandyq qoǵamdyq damý ınstıtýtyna qarasty MediaLab ortalyǵynyń qoldaýymen ótedi.
