Memleket basshysy byltyrdan bastap Úndistan, Iran jáne Qytaı azamattary úshin vızasyz rejım engizilgenin eske salyp, bul shara ShYU memleketteri arasyndaǵy týrızmdi damytýǵa yqpal etkenin tilge tıek etti. Osy tusta Prezıdent Qazaqstannyń ShYU-ǵa tóraǵalyq etý kezeńinde Almaty qalasyn Shanhaı yntymaqtastyq uıymynyń týrıstik jáne mádenı astanasy dep jarııalaýdy usyndy.
«ShYU-nyń keń baıtaq keńistigi – Eýrazııalyq órkenıettiń altyn besigi. Al mádenıetterdiń birtutastyǵyn aıshyqtaıtyn biregeı «Shanhaı rýhy» – onyń baǵa jetpes qundylyǵy. Ortaq ıdealdarymyz ben qundylyqtarymyzdy álemge dáıekti túrde dáripteý mańyzdy. Qazaq jeri – ejelden órkenıetter toǵysqan, dástúrler men mádenıetter bite qaınasqan meken. Al búginde Qazaqstan bárimizge ortaq, baı rýhanı murany saqtaý jáne ony nasıhattaý isine barynsha atsalysýǵa daıyn. Osyǵan oraı «ShYU-nyń kıeli oryndary» jobasyn qolǵa alýdy usynamyz. Uly oıshyl Qoja Ahmet Iаsaýı kesenesi Qazaqstandaǵy álemdik mańyzy bar osyndaı kıeli oryn sanalady. ShYU-nyń «Altyn Orda jáne onyń murasy» atty konferensııasy aıasynda osy ortaǵasyrlyq sáýlet óneriniń uly eskertkishiniń tanystyrylymyn qasıetti Túrkistan shaharynda ótkizýdi josparlap otyrmyz. Mundaı aýqymdy shara elderimiz arasynda anaǵurlym tyǵyz gýmanıtarlyq baılanystar ornatýǵa yqpal etetinine senimdimin», dedi Qasym-Jomart Toqaev.
