Qylmys pen quqyq buzýshylyqtyń aldyn alýda beınebaqylaý kameralarynyń kómegi óte zor. Bul qurylǵylar – jol ınfraqurylymynyń baqylaýda turǵanyn eskertetin birden-bir qural. «Adamdar óz is-áreketteriniń kameraǵa jazylatynyn bilgen jaǵdaıda zańǵa eriksiz baǵynady. Bul qylmystyń aldyn alyp, qala qaýipsizdiginiń jaqsarýyna muryndyq bolady», deıdi mamandar.
Beınebaqylaý kameralary jyldamdyqty arttyrý, baǵdarshamnyń qyzyl túsine ótý sekildi birqatar ereje buzýshylyqty der kezinde anyqtaı alady. Qalanyń baqylaý aýmaǵynda avtokólik trafıgin tirkeýge jáne jyldamdyq rejiminiń buzylý belgileri men oqıǵalardy anyqtaýǵa arnalǵan 70 apparattyq-baǵdarlamalyq keshen bar. Sondaı-aq jol qıylysyndaǵy baǵdarshamnyń tyıym salý sıgnalyna ótý men toqtaý syzyǵyna shyǵý erejelerin buzý oqıǵalaryn anyqtaýǵa arnalǵan 16 keshen jumys isteıdi.
Baqylaý kameralary kólik qozǵalysy, qozǵalys tártibi jáne jaıaý júrginshilerdiń júris-turysy týraly derekterdi úlken kólemde jınaýǵa múmkindik beredi. Bul derekterdi qalalyq ınfraqurylymdy taldaý jáne josparlaý úshin paıdalanýǵa bolady. Osy oraıda jaqynda Abaı, Shahtınsk qalalary men Shahan, Dolınka jáne Severo-Zapadnyı kentterindegi beınebaqylaý kameralary biryńǵaı qalalyq beınebaqylaý júıesine biriktirildi. Derekterge súıensek, oblysqa qarasty qalalarda bıylǵy 5 aıda jol-kólik oqıǵalary sany 2022 jylǵy sáıkes kezeńmen salystyrǵanda 16,2 paıyzǵa tómendegen.
«Jol boıyndaǵy beınebaqylaý kameralary qalalardy qaýipsiz ortaǵa aınaldyrý úshin mańyzdy ról atqarady. Bul qurylǵylardyń sany meılinshe artqan saıyn quqyq buzýshylyqtar qatary da azaıa bermek. Bul el turǵyndarynyń ómiri men dúnıe-múlkiniń amandyǵy úshin qajet dúnıe», deıdi jol saqshylary.
