Dóńgelek ústel jumysyna Býenos-Aıresten (Argentına) arnaıy kelgen Halyqaralyq sot ákimshiligi qaýymdastyǵynyń (IACA) prezıdenti Lýıs Marııa Palma qatysty. Alqaly jıynnan keıin ol Prezıdent Qasym-Jomart Toqaevqa jazǵan hatynda elimizdiń táýelsizdigin qamtamasyz etýdegi sot júıesiniń mańyzdy qadamdaryna erekshe toqtaldy.
«Sot ákimshiligi jáne sot reformasy salasyndaǵy 25 jyldan astam tájirıbeme arqa súıeı otyryp, Astana sot ákimshiliginiń jańa ozyq standarttaryn belgileı bastaǵanyn aıta alamyn. Álemdik úzdik tájirıbege súıengen Qazaqstan qysqa merzimde sot basqarýynyń biregeı modelin engize otyryp, tereń reformalar júrgize aldy», dep jazdy ol.
L.Palma osy ýaqytqa deıin jetekshi elder qol jetkize almaǵan sapaly jáne jyldam sot tóreligin qamtamasyz etýge baǵyttalǵan Qazaqstannyń sıfrlyq aqyldy sottaryn atap ótti. Halyqtyń sottarǵa sıfrlyq qoljetimdiligi boıynsha Qazaqstan álemde 4-oryn alady. Ol jasandy ıntellekti qoldanýdy jáne Joǵarǵy sottyń aýmaqtan tys sottylyqty bastaýyn basqa elder úshin úlgi bola alatyn tamasha tájirıbeler dep sanaıdy.
Mártebeli meıman Astana jáne Almaty sottaryna arnaıy baryp, sýdıalar men sot qyzmetkerleriniń jumysyn edáýir jeńildetetin jáne naqty ýaqyt rejiminde sot tóreligine onlaın qol jetkizý úshin yńǵaıly quraldardy usynatyn AT-servısterdiń qajettiligine kóz jetkizdi. Osyǵan oraı IACA búkilálemdik habarlyq ádisteme – onlaın konferensııa arqyly sot basqarýynda aqparattyq tehnologııalardy qoldanýdyń qazaqstandyq tájirıbesin zerdeleýge jáne taratýǵa nıetti.
«Sot júıesin qarjylandyrýdyń qazaqstandyq modeli de nazar aýdarýǵa turarlyq. Bıýdjettiń eń tómengi shegin zańnamalyq bekitý, sondaı-aq sýdıalyq ózin-ózi basqarý organynyń sýdıalyq jalaqynyń mólsherin aıqyndaý quqyǵy qazaqstandyq sottardy bıliktiń basqa tarmaqtarynan shynymen táýelsiz etýdiń qýatty quraly bolyp sanalady», dep esepteıdi L.Palma. Onyń pikirinshe, elimizdiń Sot ákimshiliginiń ınstıtýsıonaldyq deńgeıde derbes memlekettik organ retinde qalyptasýy sýdıalardy ákimshilik-bıýrokratııalyq qyzmetten bosatýǵa yqpal etti. Taqyryptyń ózektiligin jáne basqa elderden kelgen saýaldardy atap ótken IACA prezıdenti Qazaqstan Sot ákimshiligimen yntymaqtastyq týraly memorandýmǵa qol qoıylǵanyn jáne sot basqarmasynyń qazaqstandyq modeli týraly aqparatty IACA aqparattyq resýrstaryna ornalastyrǵanyn habarlady.
IACA elimizdiń Joǵarǵy sot basshylyǵyn bıyl 25-27 qazanda Býenos-Aıreste (Argentına) ótetin halyqaralyq konferensııa jumysyna qatysýǵa shaqyrdy. L.Palma osy is-shara aıasynda sot basqarmasynyń qazaqstandyq modelin tanystyrýdy usyndy. IACA Ortalyq Azııa jáne Úndistan atynan vıse-prezıdent retinde Sot ákimshiliginiń ókilderin usynbaq.
Esterińizge sala keteıik, IASA – quramynda 100-den astam memleket, sonyń ishinde AQSh, Qytaı, Kanada, Japonııa, Germanııa, Fransııa elderi bar irgeli uıym. Elimiz halyqaralyq qaýymdastyqqa 2015 jyldan beri múshe. IACA-ǵa múshe bolý únemi tájirıbe almasýǵa jáne sot menedjmentiniń ozyq qyrlaryn meńgerip, ony tyńǵylyqty pysyqtap alýǵa múmkindik beredi.
