Prezıdent Astanany sýmen qamtamasyz etý óte mańyzdy mindet ekenin atap ótti.
«Jazdyń basynda sý tapshylyǵy qatty sezildi. Buǵan turǵyndar narazylyq bildirgenin bilesizder. Tipti, joldardy bógep, mıtıngke shyqty. Bul – elorda ómirinde bolyp jatqan keleńsiz oqıǵalar. Ashyǵyn aıtsaq, qalanyń ınjenerlik ınfraqurylymyn damytýǵa jaýapty adamdar jumysyn adal atqarmaǵan. Bul – naǵyz salǵyrttyq, sonyń saldarynan osyndaı kúrdeli ahýal qalyptasty. Muny, tipti, jumysqa selqos qaraý emes, qasaqana zııan keltirý deýge bolady.
Bul salada qatelikke múldem jol berýge bolmaıdy. Sondyqtan, kináli adamdar tıisti jazasyn alýy kerek. Qazir elorda Astana sý qoımasyna tolyq táýeldi bolyp otyr. Sý alatyn basqa jer joq. Bul – óte qaýipti. Kez kelgen sátte oqys oqıǵa bolsa, búkil qalaǵa qaýip tónýi múmkin. Turǵyndar sany kóbeıip, jańa nysandar paıdalanýǵa berilip jatyr. Sondyqtan, sý qoımasynyń qýaty aldaǵy bir-eki jylda sarqylyp bitetini anyq», dedi Memleket basshysy.
Sondaı-aq búgingi kúnderi sý qoımalary laılanyp, lastanyp jatyr. Prezıdenttiń aıtýynsha, Qoımanyń túbin tazalap, ony tereńdetý kerek. Astana sý qoımasynyń bógetin tolyq tekserip, nyǵaıtý qajet. Oǵan Sátbaev kanalynan sýdyń turaqty kelip turýyn qamtamasyz etken jón.
«Osy sharalardy dereý qolǵa alý kerek. Qoımanyń tehnıkalyq jaǵdaıyn shuǵyl retke keltirý qajet. Bul – óte mańyzdy másele. Astanada budan basqa sý kózi joq. Ashyǵyn aıtsaq, mundaı ahýal kópten beri jalǵasyp keledi, ıaǵnı bul bir kúnde paıda bolǵan másele emes. Buǵan deıin Ekologııa mınıstrligine qalany sýmen qamtamasyz etý úshin keshendi jumys jasaý tapsyryldy. Biraq, áli kúnge deıin naqty nátıje joq. Tipti, osy máseleni sheshýge qatysty tıimdi usynystar da joq. Taǵy da qaıtalap aıtamyn: quzyrly mınıstrlik naqty sharalar qabyldaýǵa tıis», dedi Q.Toqaev.
Memleket basshysy atap ótkendeı Astanany aýyz sýmen qamtamasyz etý máselesin keıinge qaldyra berýge bolmaıdy.
«Tıisti jumys atqarylmasa, muny astyrtyn qarsylyq bildirý dep túsinýge týra keledi. Ahýaldy dereý túzeý qajet. Bas qalany osyndaı jaǵdaıda qaldyrmaımyz. Úkimet ákimdikpen birlesip, kelesi jyldan bastap Sátbaev kanalynan qalaǵa deıin qubyr tartý jumystaryn qolǵa alýǵa tıis. Sonymen birge, Úkimet ákimdikpen birge sýmen qamtamasyz etýdiń balamaly joldaryn qazirden bastap qarastyrýy kerek», dedi el Prezıdenti.
Sondaı-aq taǵy bir óte ózekti másele – qaldyq sýdy tazartý. Qazir qalada bir ǵana káriz tazartý qondyrǵysy bar, ıaǵnı onyń jumys júktemesi shamadan tys bolyp tur.
«Búginde táýligine qosymsha 140 myń tekshe metr sýdy tazartý qajet. Osyndaı ekinshi qondyrǵy úshinshi sorǵy-súzgi stansasymen qatar salynýǵa tıis edi. Úshinshi sorǵy-súzgi stansasy paıdalanýǵa berileıin dep jatyr. Al, káriz tazartýdyń ekinshi qondyrǵysyn jobalaý jumystary áli bitken joq. Jumysty durys josparlamaýdyń kesirinen túıtkilder qordalana beredi. Sondaı-aq kelesi jyly tórtinshi sorǵy-súzgi stansasyn salýǵa kirisý kerek. Telman eldi mekenindegi sorǵy stansasynan tehnıkalyq sý qubyryn tartýdyń ekinshi jelisiniń qurylysyn da bastaý qajet», dedi Memleket basshysy.
Sondaı-aq Prezıdent ákimdikke kelesi jyldyń sońyna deıin qaldyq sýdy jınaqtaıtyn Qarabıdaıyq kólin keńeıtýdi tapsyrdy.
«Qazir tazartý qondyrǵylary arqyly aǵyzylatyn qaldyq sý Esil ózenin lastaýda. Úkimet osy aǵyzylatyn qaldyq sýdyń kólemin normatıvtik turǵydan retteýi qajet. Elordada ekologııa talaptary qatań saqtalýǵa tıis. Sondaı-aq, jaýyn-shashyn bolǵanda kóshelerdi sý basyp ketedi. Bul da ózekti másele bolyp otyr.
Káriz júıesi sý aǵynyna tótep bere almaıdy. Jýyrdaǵy jańbyr kezinde osyǵan taǵy bir márte kózimiz jetti. Jańa nóser káriziniń qurylysy tolyq aıaqtalǵan joq. Ákimdik naqty sharalar qabyldaýǵa tıis. Jalpy, bas qalany sýmen qamtamasyz etýdiń jáne sý tartýdyń tıimdi júıesin qalyptastyrý óte mańyzdy. Bul – turmys sapasyn jaqsartýǵa qajetti basty talaptardyń biri», dedi Qasym-Jomart Toqaev Elordany damytý máseleleri jónindegi keńes barysynda.
