Kórmege taıaýda ǵana kıiz basý kýrsyn támamdaǵan qarapaıym qala turǵyndarynyń qolynan shyqqan qyryqtan astam qolóner týyndysy qoıylǵan. Olardyń ishinde syıkádege jararlyq sándi buıymdar, shaǵyn syrmaq, tekemet, basqur, kilemsheler bar.
Uıymdastyrýshylardyń aıtýynsha, osydan eki apta buryn arnaıy kıiz basý kýrsy ashylyp, Baıan Batalova, Dınara Qypshaqbaeva syndy sýretshi ustazdar otyz adamǵa ulttyq qolónerdiń qyr-syryn úıretken. Bul ekspozısııa sol otyz adamnyń on bes kún ishinde jasap shyqqan dúnıelerin kópshilik nazaryna usynyp otyr.
– Qazaq dalasynda sonaý kóshpeli órkenıet mádenıetinen bastaý alatyn kıiz basý óneriniń bes myń jyldan astam tarıhy bar. Búgingi is-sharany osy ulttyq qazynamyzdy óltirmeı, urpaqtan urpaqqa amanattap bizge deıin jetkizgen aq kımeshekti ájelerimiz ben asyl analarymyzǵa degen taǵzym-qurmet dep bilemin, – deıdi oblystyq tarıhı-ólketaný mýzeıiniń dırektory Batyrhan Jumabaev.
Eki aptalyq kıiz basý kýrsyna qabyldanǵan otyz shákirttiń ishinde úı sharýasyndaǵy qyz-kelinshekter, zeınetkerler men stýdentter bar. Olardy ulttyq qolónerge baýlyp, oqytyp, toqytyp shyǵarǵan ustaz Dınara Qypshaqbaevanyń aıtýynsha, ásirese ártúrli sebeppen ýaqytsha úıde otyryp qalǵan áıelderdiń ulttyq qolónerge degen qulshynysy zor.
– Kýrs barysynda shákirtter qazaq halqynyń ulttyq oıý-órnek óneriniń tarıhy men baǵyttaryn oqyp meńgerdi. Oıý-órnekterdiń qyr-syryn meńgere otyryp, ár úırenýshi óziniń tól kompozısııasyn jasap shyqty. Biz áý basta satýǵa nemese jaqyndarymyzǵa kádesyı retinde syılaýǵa bolatyn qarapaıym ári shaǵyn buıymdardy jasap shyǵarýdy maqsat tutqan edik. Biraq ózderińiz kórip otyrǵandaı, tańbaly petroglıfter men Tobyl oıshyly beınelengen sıýjetti óner týyndylaryn da jasaýǵa qol jetkizdik. Ár tapsyrmany asqan shabytpen atqaryp shyqqan shákirtterime óte rızamyn. Halyqtyń qolóner buıymdaryn jasap úırenýge degen yntasy óte joǵary, – deıdi Dınara.
Qysqa merzim ishinde kıizden kóz tartar kórkem dúnıe jasap shyǵarýdy úırenip shyqqan qyz-kelinshekterdiń qatarynda zeınetker Tatıana Akýlova da bar. Kórmege Tatıana Pavlovnanyń qolynan shyqqan 5 birdeı týyndysy qoıylypty.
– Kóp jyl boıy mektepte hımııa-bıologııa pániniń muǵalimi bolyp jumys istedim. Taıaýda ǵana zeınetke shyqtym. Osy kýrsqa qabyldaý júrip jatqanyn áleýmettik jeliden kórip, táýekel etip kelgenmin. О́zim shyǵarmashylyqpen aınalysqandy unatamyn. Sodan bolar, ońaı meńgerip aldym. Júnmen jumys isteý, kıiz basý degen dúnıe janyma jaqyn eken, birden unady. Qazir kıizden kıimder, kádesyılar men turmysqa qajet zattardy, tipti áıelderdiń áshekeı buıymdaryn jasaý da qolymnan keledi. Qoshqar múıiz, qos múıiz, túıe taban sııaqty oıý-órnekterdi jasaýdy úırendim. Kýrsqa qatysýshylar bárimiz jabylyp Qazaqstannyń kıiz kartasyn jasap shyǵardyq. Men Almaty oblysy men Ulytaý oblysyn jasap shyqtym, – deıdi ardager ustaz.
Saltanatty sharanyń sońynda kıiz basý kýrsyn támamdaýshylar sertıfıkattaryn alyp, úzdik shákirtterge arnaıy dıplomdar tabys etildi.
Qostanaı oblysy
