Páter kiltin oblys ákimi Beıbit Isabaev pen Taldyqorǵan qalasynyń ákimi Ernat Bázil tabystady. Jańa qonysqa ıe bolǵandardyń basym bóligi – kópbalaly otbasylar, ata-ana qamqorlyǵynsyz qalǵandar, ardagerler men I-II toptaǵy múgedekter.
«Jyl basynda «bıyl 51 úı beremiz» dep ýáde etkenbiz. Osyǵan deıingi bergenderimizdi esepke alsaq, endi 43 úı qaldy. Endi Taldyqorǵanda aı saıyn úıdiń kiltin tabystaý saltanatyna jınalap turamyz. Jyl sońyna deıin 51 úıdi tolyq beremiz. Jyl basynan beri 280 adam úıli bolsa, jyl sońyna deıin taǵy 1 700 turǵan jańa páterge kóshedi. Negizgi maqsat – úı kezegindegilerdiń sanyn azaıtý. Dál qazirgi sátte Taldyqorǵanda 15 myń adam úı kezeginde tur. Aldaǵy 4-6 jyl ishinde kezektegiler sanyn eki ese azaıtýdy kózdep otyrmyz. Osyǵan deıin kezekke baılanysty túsinbeýshilik, zańsyzdyqtar boldy. Biz turǵyndar kezegin sıfrlyq júıege kóshirdik. Endi kez kelgen adam óz kezegin úıinde otyryp-aq baqylaı alady», dedi B.Isabaev.
Artynsha oblys basshysy saltanatty túrde berilgeli turǵan úıdiń salynýyna atsalysyp, qoldaǵan «Shymyr» JShS dırektory Rýslan Valıshanovqa alǵysyn bildirdi.
El aldynda 50 adamnyń esimi atalyp, ákimderdiń qolynan kilt aldy. Úıdiń qurylysy 2020 jyly bastaldy. Al úıde 98 páter bar: 1 bólmeli – 42, 2 bólmeli – 28, 3 bólmeli – 28. Kópbalaly otbasy sanatynan Kamshat Saılaýbaıqyzy – qýanyshqa kenelgenderdiń biri. Ol osyndaı shattyqqa bólegen jandarǵa alǵysyn aıtyp, ózi sııaqty páter kiltin alǵandarǵa quttyqtaýyn jetkizdi. Saltanatty túrde kilt tabystap bolǵan oblys basshysy úıdi aralap, kópbalaly otbasynyń atynan kilt alǵan Araı Omarovanyń páterinde bolyp, aq tilegin arnady.
Buǵan qosa Jarkent qalasynda 60 páterli kópqabatty eki úı salynyp jatyr. Sondaı-aq baspana kezegindegiler úshin taǵy 80 páterli turǵyn úı qurylysy bastaldy.
Alǵashqy atalǵan eki turǵyn úı qurylysyn «Qurylys ındýstrııa kompanııasy» JShS salyp, qazir qurylystyń 65 paıyzy aıaqtaldy. Munda 58 jumysshy eńbek etedi, 3 tehnıka – qoldanysta.
«Jumys sapasy qurylysshylardyń biliktiligine baılanysty. Bizde jalpy 12 tas qalaýshy bar, solardyń arasynda Táńirbergen Álimbaev, Sáken Seıitjanov, Maqsat Qasteev syndy eńbekkerler sheberligimen erekshe qyrynan tanylyp jatyr», deıdi prorab Erlan Qarsaqbaev.
Bul úılerdiń aınalasyn kóriktendirý men ınjenerlik-kommýnıkasııalyq júıesin «Garant stroı grýpp – 2016» JShS atqarady. Qurylys zattary baǵasynyń kúrt kóterilýine jáne Almaty oblysynyń bólinýine baılanysty jyl basynda jumys biraz ýaqyt toqtap, qurylys jobasyna qosymsha qarjy qarastyryldy.
Ekinshi nysandaǵy 80 páterli turǵyn úı qurylysyn bastaýǵa kelisimshart jasalyp, qurylys-montaj jumysy bastalmaq. Aýdandaǵy barlyq qurylystyń sapaly ári ýaqytyly atqarylýy – quzyrly oryndardyń turaqty baqylaýynda. Nysan paıdalanýǵa berilgenge deıin kemshilikter túzetiledi. Keıingi jyldary qurylysqa bólinetin qarjy 300 mln-nan 30 mlrd teńgege deıin kóbeıdi. Nátıjesinde, Jarkent kórkeıip, jaınap keledi.
