Sot anyqtaǵandaı, 2022 jylǵy 8 qarashada saǵat 14:00 shamasynda sottalýshy A. Abylaı han kóshesiniń boıymen ońtústik baǵytta №98 avtobýsty basqaryp, Abylaı han jáne Tóle bı kósheleriniń qıylysynda jol qozǵalysy erejesin elemeı, baǵdarshamnyń tyıym salynǵan qyzyl túsine ótip, Tóle bı kóshesimen kele jatqan №201 avtobýspen soqtyǵysqan. Jol-kólik oqıǵasy kezinde №98 avtobýstyń jolaýshylary soqqy saldarynan áınekke soǵylyp, syrtqa qulaǵan. Nátıjesinde jábirlenýshi I. avtobýs astynda qalyp, alǵan jaraqattarynan qaıtys bolǵan. Sondaı-aq jábirlenýshi K. aýyr dene jaraqatyn alsa, taǵy bir jábirlenýshi Sh. ortasha aýyrlyqtaǵy dene jaraqatyn alǵan.
Sotta sottalýshy óz kinásin moıyndamaı, ózin aqtaýdy suraǵan.
Adam ólimine ákep soqtyrǵan jol qozǵalysy erejesin buzǵan №98 avtobýs júrgizýshisi kináli dep tanylyp, 2,5 jylǵa bas bostandyǵynan aıyryldy. Sondaı-aq ol 5 jyl merzimge kólik quralyn basqarý quqyǵynan aıyryldy. Sonymen qatar moraldyq shyǵyndy óteý retinde jábirlenýshilerdiń árqaısysyna 2 mıllıon teńge óndirildi.
Úkim zańdy kúshine engen joq.
Eske sala keteıik, 2022 jyldyń qarasha aıynda Abylaı han men Tóle bı qıylysynda iri jol apaty boldy. №98 avtobýs №201 avtobýspen soqtyǵysty. Soqtyǵys saldarynan avtobýstyń astynda qalǵan er adam qaıtys boldy. Taǵy 21 adam jaraqat aldy, onyń toǵyzy aýyr jaraqat aldy.
№98 avtobýstyń 36 jastaǵy júrgizýshisi QR Qylmystyq kodeksiniń 345-babynyń 3-bóligi «Kólik quraldaryn basqaratyn adamdardyń abaısyzda adam ólimine ákep soqqan jol júrisi nemese kólik quraldaryn paıdalaný qaǵıdalaryn buzýy» boıynsha kináli dep tanyldy.
