Búginde qalalyq arhıvte 736 qor jáne 404 458-den astam saqtaý birligi bar. Elorda turǵyndarynyń tarıhynyń shynaıy aıǵaǵyna aınalǵan kórnekti qujattardyń jeke tektik qor esebinde mańyzy zor. Máselen, arhıv qoryna tapsyrylǵan qujattar Ǵabdolla Báıtenulynyń týǵan ólkesi Qaraqoıyn – Qashyrly óńiriniń rýhanı, saıası ómirinen, mádenıeti men tarıhynan mol maǵlumat beredi. Bul óz kezeginde sol ólkeniń azamattaryna úlken aqparattyq kómek.
Shara barysynda batyrdyń ómirbaıany men óshpes murasy arqaý bolǵan «Qashyrly syr-sandyǵy» atty basylymnyń tusaýy kesildi. Bul eńbekte qalamgerdiń ómirden túıgen oı-pikiri men paıymy, qoljazba ıesiniń shyǵarmalary, ósıet sózderi, el arasynan jınap-tergen shejire-dastandary toptastyryldy. Shyǵarmalarda qazirgi ýaqytta umytylyp bara jatqan jer-sý ataýlarynyń fotosýretteri de kórinis tapqan.
«Aýylyńda qartyń bolsa, jazyp qoıǵan hatpen teń» degen qazaqtyń naqyl sózi bar. Osy qazynaly qarttardyń aıtyp urpaqqa qaldyrǵan ónegeli sózderi, úlgi bolar taǵylymdy isteri, eliniń, ózi týǵan ólkesiniń ósip-órkendeýine arnaǵan eńbek joldary, bir sózben aıtqanda, barlyq bolmysy – tunyp turǵan ańyz ben tarıh», dedi Astana qalasy memlekettik arhıvi dırektorynyń mindetin atqarýshy Jangeldi Bımoldın. Sonymen qatar Ǵabdolla Báıtenulynyń jazyp qaldyrǵan murasy kópshilik kórermen nazaryna kórme arqyly usynyldy. Onyń maqsaty – elimizdiń tarıhy men mádenıetine qatysty sırek kezdesetin qoljazbalardy keńinen nasıhattaý, áleýmettik rólin anyqtaý.
Jıyn sońynda qonaqtar men batyr urpaqtary estelik sýretke túsip, oqýshylarǵa kitap usyndy.
