Mańǵystaý oblysynda «Sergek» baqylaý júıesi 1 shildede iske qosylǵan. 148 beınekamera 18 shildege deıin test rejıminde jumys istedi. Qazir barlyǵy joldaǵy zańbuzýshylyqtardy jedel tirkep jatyr. Málimet birden prosessıngtik ortalyqqa kelip túsedi. Munda ár beınejazba 30 kún saqtalady eken.
«108 kamera Aqtaý qalasynda, 40 Munaıly aýdanynda tur. 8 kúnniń ishinde «Sergek» arqyly 2 171 quqyqbuzýshylyq deregi anyqtalyp, 21 mln 971 myń teńgege aıyppul salynǵan. Ákimshilik-quqyqbuzýshylyq týraly Kodekstiń 811-babynyń, 1-bóligine sáıkes salynǵan aıyppuldyń 7 táýlik ishinde 50% tóleý múmkindigi qarastyrylǵan», dedi oblystyq PD ÁPB bólim bastyǵy Tımýr Jumalıev.
