Foto: QR Qorǵanys mınıstrliginiń resmı saıty
«Atamnyń amanaty» qoǵamdyq birlestiginiń sporttyq shara ótkizý týraly bastamasyn Qorǵanys mınıstrligi men Ulttyq ulan jáne Astana ákimdigi qoldady.
«Eki márte Keńes Odaǵynyń Batyry ataǵyna ıe bolǵan jalǵyz qazaq Talǵat Bıgeldınov kózi tirisinde-aq ańyzǵa aınaldy. Biz «101 jyl – 10,1 km» jarysy qazaqstandyqtar úshin jaqsy messedj bolaryna senemiz jáne sharaǵa belsene qatysady dep oılaımyz», dep uıymdastyrýshylar tarapy jarysqa kásipqoılardy ǵana emes, áýesqoı júgirýshilerdi de shaqyrǵandyqtaryn ańdatpada atap aıtqan.
Saltanatty ashylý rásimi Qarýly kúshter áskerı qyzmetshileriniń, UQK Shekara qyzmetiniń jáne Ulttyq ulannyń saltanatty sap túzeýimen bastalady.
Qorǵanys mınıstrliginiń áskerı ansamblderi, Ulttyq ulan, elordanyń shyǵarmashylyq ujymdary jáne qurmet qaraýyl rotasynyń defılesi shara aıasynda óner kórsetedi. Oǵan qosa jármeńke uıymdastyrý josparlanyp otyr.
Talǵat Jaqypbekuly Bıgeldınov jaýyngerlik jolyn qatardaǵy ushqysh bolyp bastap, soǵysty gvardııalyq avıapolk eskadrılıasynyń komandıri retinde aıaqtaǵany málim. Soǵys jyldary shabýyldaýshy Il-2 ushaǵymen asa kúrdeli hám jaýapty tapsyrmalardy oryndaǵan shaqtarda jaraqat alǵan ol birneshe márte ajal apanynan aman shyqqan.
Jeńis jolynda óz ómirin talaı márte qaterge tikken Talǵat Bıgeldınovtyń erlikteri Qazaqstan tarıhynda máńgilik qalary anyq. Aty ańyzǵa aınalǵan ushqyshtyń qurmetine arnap osyndaı shara ótkizý Uly Otan soǵysy batyrlaryn jadymyzda jańǵyrtyp, urpaqqa ónege etýdiń ajyramas baılanysyn aıǵaqtasa kerek.
