Eńbekshiqazaq aýdanynyń ortalyǵy Esik qalasynda turatyn Dınara Rymbekova eki jyl buryn «2021-2025 jyldarǵa arnalǵan kəsipkerlikti damytý jónindegi ulttyq joba» konkýrsyna qatysyp, óz baǵdarlamasyn sətti qorǵap, «Damý» kəsipkerlikti damytý qory arqyly 2 mln teńge mólsherinde grantqa qol jetkizgen. Qolǵa tıgen qarjynyń ər tıynyn tıimdi paıdalanýdy kózdegen jas kəsipker bıznes josparyna səıkes makaron ónimderin shyǵarýdy bastap ketti. Osy maqsatta zamanaýı ıtalııalyq óndiristik tehnıkalar satyp alyp, iske qosty.
Búginde «As qazan» dep atalatyn makaron sehynda 4 adam turaqty jumys istep, təýligine 5 tonna otandyq joǵary sapaly makaron ónimderin shyǵarýdy jolǵa qoıǵan. Al aıyna qýattylyǵy orta eseppen 200 tonnaǵa jýyqtaıtyn kəsiporyn da makaronnyń 9 túri óndiriledi.
«Qazir shaǵyn jəne orta bıznesti damytyp, eldiń əl-aýqatyn arttyrýǵa Prezıdentimizdiń basa kóńil bólip otyrǵany belgili. Sol sebepti memleketten kəsipkerlikti damytýdyń túrli baǵdarlamalary usynylyp, kəsip kózin tapqandarǵa qoldaý kórsetilýde. Sonyń nətıjesinde otandyq kəsiptiń kókjıegin keńeıtip, turaqty jumys ornyn ashyp aldyq. Atalmysh kəsiporynda 4 adam tııanaqty eńbek etip, otbasyn asyrap júr. О́nim óndirýde tutynýshylardyń jas ereksheligi men talǵamyna saı kelýin eskerdik», degen kəsipker Dınara ónimderin ótkizýde elaýmaǵyndaǵy 13 óńirdiń saýda núktelerimen kelisimshart jasasqanyn tilge tıek etti.
Bul oraıda «As qazan» brendtik ónimderin jarnamalaý jumystary da qalypty jolǵa qoıylǵan. Əleýmettik
jelilerdegi resmı paraqshalaryndaǵy tutynýshylar pikirin eskerip, sol arqyly sapany arttyryp, qyzmet kórsetý deńgeıin jaqsartý joldary saralanýda. Osylaısha, jas kəsipker keleshekte ónim túrlerin kóbeıtýmen qatar, bıznesin damytýǵa múmkindik beretin ınvestısııalyq jobalarǵa nazar aýdarýdy berik ustanyp otyr. Dese de jumysyn endi damyta bastaǵan jas kəsipkerdi tolǵandyryp júrgen jaıttar joq emes.
«Memleket tarapynan ónimderimizdi ótkizýge qoldaý kórsetilse jón bolar edi. О́ıtkeni kez-kelgen saýda jelileri men dúkenderge óz ónimderimizdi sataalmaımyz. Tipten joǵary sapaǵa ıe ónimderimizdi eksportqa shyǵarýǵa múmkindik berilse degen nıetimiz bar. Bul jaǵynan kəsipkerlik qyzmetti odan əri damytýǵa shekten tys
əkimshilik júktemeler kedergi keltiretinin jasyrýǵa bolmas. Otandyq ónim óndirýshi jas kəsipkerlerdi yntalandyrý úshin bıznesti qarjylandyrý saıasaty rettelip, paıyzy tómen nesıeler berilse, bul bizdiń isimizdi ilgeriletip, órkendetýge múmkindik bolar edi», degen oıda kəsipker.
«Jas kelse – iske» degen emes pe? Elimizdegi ónim óndirýshi kəsiporyndardyń qataryna qosylyp, bəsi joǵary bəsekelestik talaptaryna saı sapaly makaron óndirýde damyl tappaı izdenip, iskerlik tanytyp júrgen Dınara Rymbekovanyń aldaǵy maqsattary aıqyn. Ol – otandyq óndiristi órkendetip, jumys ornyn kóbeıtý.
