«Kózimniń qarasy,
Kóńilimniń sanasy,
Bitpeıdi ishimde
Ǵashyqtyń jarasy.
Qazaqtyń danasy,
Jasy úlken aǵasy.
Bar demes sendeı bir
Adamnyń balasy.
Jylaıyn, jyrlaıyn,
Aǵyzyp kóz maıyn.
Aıtýǵa kelgende
Qalqama sóz daıyn.
Júrekten qozǵaıyn,
Ádepten ozbaıyn.
О́zi de bilmeı me,
Kóp sóılep sozbaıyn».
Muny ońashalaý kezde aqyryn aıtyp otyratyn ádetim bar. Mende ǵana emes shyǵar. Sondaıda bir kúni ekinshi shýmaǵyna qalaıda kidirgenim. Máni bólek... Jigittiń arnaý sózin bastaı bere ózin-ózi ózgeniń, ıaǵnı qyzdyń aýzymen: «Qazaqtyń danasy...» dep qolpashtaýy qalaı? Oıǵa qonbaıdy ǵoı?.. Qyzdyń jarysa aıtqany deýge kelmeıdi, jigit pen qyzdyń aıtysy emes. Oılandym... Abaıdyń «Jigit sózi» men «Qyz sózi» bar. «Jigit sózi» – «Aıttym sálem, qalamqas», al «Qyz sózi...» esimde, myna 2-shýmaq sondaǵylarǵa óte uqsas! Abaıdyń óleńder jınaǵyn alyp, «Qyz sózine» úńildim:
«Qıystyryp maqtaısyz,
Oılasań ne tappaısyz?
Bizde erik joq, óziń bil,
Áldenege bastaısyz.
Biz de árkimdi baıqaımyz,
Tap bergennen taıqaımyz.
Sizdeı asyl kez bolsa,
Qaıtip basty shaıqaımyz?» –
degeninen soń:
«Qazaqtyń danasy,
Jasy úlken aǵasy.
Bar demes sendeı bir
Adamnyń balasy», – bolyp tursa, ábden qısyndy, jarasymdy!
Menińshe, aqynnyń jurtqa aýyzsha taraǵan óleńderin jınaǵandardyń biri ony aıtyp bergen kisiniń qateleskenin ańǵarmaǵan. Alǵashqy jınaǵyn qurastyrǵandar da «Abaı óleńderin» taldap jatpaǵan. Al odan beride aqyn shyǵarmashylyǵyn zerttegen, búgin de zertteý maqala jazyp júrgen abaıtanýshylardyń nazaryna ilikpegeni túsiniksiz. Abaı jınaqtary aldaǵy ýaqytta da shyǵady, sonda myna aǵattyq eskeriledi, ánshilerimiz bolsa, «adasqan» 2-shýmaqsyz aıtýlary kerek dep oılaımyn.
Ǵabbas QABYShULY,
jazýshy
