Qarjy mınıstrliginiń habarlaýynsha, keıbir kásipkerlerdiń bankterde ashylǵan jeke shottaryna tólemdi mobıldi aýdarym arqyly alýy saldarynan baqylaý-kassa mashınalary (BKM) men POS-termınaldar qoldanylmaıdy, tıisinshe chek te berilmeıdi. Bul – eskertý túrindegi ákimshilik jaýapkershilik kózdelgen zań buzýshylyq. Qaıtalama zań buzýshylyq kezinde salyq tóleýshiniń sýbektiligine baılanysty salynatyn aıyppul 15-ten 50 AEK-ke deıin barady.
«QR Konstıtýsııasyna sáıkes salyq tóleý – árkimniń mindeti. Salyq organdary zańsyz kásipkerlik qyzmetti kóleńkeden shyǵarý maqsatynda tıisti baqylaý júrgizedi. 2024 jyldan bastap bank uıymdary jeke kásipkerlerdiń mobıldi aýdarymdary boıynsha derekterdi beredi. Kúntizbelik úsh aı qatarynan aı saıyn 100 túrli tulǵadan mobıldi aýdarymdar alǵan azamattar baqylaýǵa alynady», dep málimdedi Qarjy mınıstrligi.
Baqylaý-kassa mashınalaryn qoldanýdy jeńildetý úshin 2022 jyldan bastap BKM fýnksııalaryn ekinshi deńgeıdegi bankterdiń POS-termınaldarymen biriktirý boıynsha qanatqaqty joba júrgizilip jatyr. Bul BKM men POS-termınaldyń bir chegin berýge múmkindik beredi. Atalǵan jobaǵa qatysyp jatqan bankter – «Kaspıı bank» AQ, «Halyq bank» AQ jáne «Bank SentrKredıt» AQ.
Sonymen qatar BKM chekterin bermeý faktilerin anyqtaý boıynsha «Azamattyq baqylaý – Chekti talap et» aksııasy da qolǵa alyndy. Anyqtalǵan buzýshylyqtar týraly «Wipon cashback» tegin mobıldi qosymshasy arqyly habarlaýǵa bolady.
Mınıstrliktiń málimdeýinshe, joǵaryda atalǵan ózgerister adal salyq tóleýshilerge áser etpeıdi jáne tek zańsyz kásipkerlik qyzmetti kóleńkeden shyǵarýǵa baǵyttalǵan. Iаǵnı jeke tulǵalar, burynǵydaı, ózderiniń jeke maqsattary úshin týystaryna, dostaryna, ata-analary men balalaryna jáne basqa da ómirlik jaǵdaılarǵa arnalǵan aýdarymdardy jasaı alady jáne qabyldaı alady.
