Prezıdentimiz álemdik básekege qabiletti jáne zamanaýı ınnovasııalyq tehnologııaǵa arqa súıeıtin ekonomıkany ornyqtyrý, bul úshin memlekettik sharýashylyqtyń barlyq salasynda óz isin jetik biletin bilikti mamandar bolýy qajettigin buryn da aıryqsha atap kórsetken bolatyn. Bul rette joǵary oqý oryndarynyń básekege qabilettiligin kúsheıtýdiń mańyzy zor. Al básekege tótep berý eń áýeli bilim sapasyn arttyrýǵa, bilim alýshylarǵa jáne bilim berýshilerge talaptarǵa saı jaǵdaı jasaýǵa baılanysty.
Qazaqstan men Ortalyq Azııadaǵy eń úzdik joǵary oqý oryndarynyń qataryndaǵy Almaty tehnologııalyq ýntversıteti taǵam, óńdeý, toqyma jáne jeńil ónerkásip salalary, ınjınırıng jáne IT, bıznes, qyzmet kórsetý men qonaqjaılylyq ındýstrııasy úshin mamandar men ǵylymı kadrlar daıarlap keledi. Ýnıversıtet jahandyq bilim berý keńistigine belsene kirigip, halyqaralyq aýqymda barǵan saıyn tanyla túsý ústinde. Munda tańdaǵan mamandyqtar boıynsha óndiristegi praktıkamen tikeleı ózara baılanysty qamtıtyn osy zamanǵy ǵylymı-bilim berý úderisi joǵary deńgeıde qurylǵan. Munyń bári onyń álemdik, óńirlik jáne ulttyq reıtıngterdegi kórsetkishterimen qýattalady. Máselen, osy jyly QS Quacquarelli Symonds (Ulybrıtanııa) Halyqaralyq reıtıng agenttiginiń aıqyndaýy boıynsha, Almaty tehnologııalyq ýnıversıteti dúnıejúziniń 100 eliniń tańdaýly oqý oryndary arasynda 801-850 oryndy ıelendi. Bul óte jaqsy kórsetkish dep baǵalanady. Sondaı-aq QS Stars halyqaralyq reıtınginiń sarapshylary «Bilim berý» jáne «Jumysqa ornalasý» sanattary boıynsha ATÝ-dy 5 juldyzben atap ótti. Qazaqstan joǵary oqý oryndarynyń Ulttyq reıtınginde ATÝ úzdik joǵary oqý oryndary bestigine kiredi. Bul bilim sapasyna qatysty derekterdiń bir parasy ǵana.
Ǵylym jáne joǵary bilim mınıstrligi bilim sapasyn arttyrý, stýdentterge qajetti jaǵdaı jasaý, ásirese jataqhanamen qamtamasyz etý máselesinde oqý oryndarymen tyǵyz baılanysta. Osy oraıda aıtar bolsaq, ATÝ-dy tańdaǵan memlekettik grant ıeleriniń sany jyldan-jylǵa kóbeıe túsýde, sonyń ózinde jatynjaıǵa muqtaj stýdentterdiń 75 paıyzy jataqhanadan oryn alady, bul qoldanystaǵy normaǵa saı kórsetkish. О́tken jyly «Egemen Qazaqstan» gazetinde stýdentter sanynyń arta túsýin eskere otyryp, taǵy bir jataqhana salynatynyn aıtqan edik. Mine, jańa oqý jyly 300 oryndyq zaman talabyna saı jańa jataqhana ǵımaratynyń paıdalanylýǵa berilýimen bastalmaq. Buǵan qosa taǵy birli-ekili jataqhana salý úshin jer telimin alý maqsatynda Almaty qalasy ákimdigimen jumys júrgizilip jatyr.
Sonymen qatar jataqhanalardyń barlyǵynda tıisinshe kúrdeli nemese aǵymdaǵy jóndeý jumystary júrgizildi. Qazirgi kezde bári de jańa oqý jylyna saqadaı saı tur. Ýnıversıtettiń bas korpýsynda da jóndeý jumystary júrgizilip, jylý júıeleri jańartyldy.
Qazirgi ýaqytta 8 myńǵa jýyq stýdent oqıtyn ATÝ-dyń ǵylym-bilim turǵysynan aıtarlyqtaı materıaldyq-tehnıkalyq bazasy bar. Munda bes fakýltet, ýnıversıtet bazasynda qurylǵan Qazaqstan-Shveısarııa qonaq úı bıznesi jáne týrızm ınstıtýty, 3 ǵylymı zertteý ınstıtýty, 12 oqý-ǵylym ortalyǵy, zamanaýı jabdyqtarmen jaraqtandyrylǵan 13 ǵylymı zertteý zerthanasy, shaǵyn zaýyttarǵa ıe taǵam jáne óńdeý óndirisi tehnoparki, meıramhana isi men qonaq úı bıznesi oqý ortalyǵy, tamaqtandyrý kombınaty, 2 sport zaly men stadıon, 2 medpýnkt, baspahana, stýdentterge qyzmet kórsetý ortalyǵy bar. Materıaldyq-tehnıkalyq baza aýqymy 70 myń sharshy metrdi quraıdy, oǵan 4 oqý korpýsy, 5 stýdenttik jataqhana kiredi.
Granttar arqyly jáne aqyly negizde bilim alýshylar sanynyń artýyna oraı 9 qabattan turatyn taǵy bir jańa oqý korpýsynyń qurylysyn bastaý kózdelip
otyr.
Ýnıversıtet jetistikteriniń barlyǵy – onyń professor-oqytýshylar quramy men barlyq qyzmetkerleri eńbeginiń jemisi. Olardyń jalaqysy bıyl 30 paıyzǵa kóterildi. Basqa da materıaldyq jáne moraldyq turǵydan qoldaý sharalary árdaıym nazarda tur.
Sóz basynda, Prezıdent atap kórsetkendeı, Qazaqstanda ekonomıkalyq damýdyń jańa úlgisine kóshý qolǵa alynatynyn aıttyq. Soǵan oraı, elimizde turaqty suranystaǵy, halyq tutynatyn taýarlar shyǵaratyn jeńil ónerkásip salasyn jedel jańǵyrtyp, órkendetý kerek. Sonda myńdaǵan adam jumys oryndary ashylar edi, osy salada básekege qabiletti otandyq taýarlar keńinen óndirilip, el ishinde jáne syrtta suranysqa ıe bolatyndaı jaǵdaılardy qarastyrýdy Úkimet nazaryna usynar edik. Almaty tehnologııalyq ýnıversıteti bul iske belsene aralasýǵa daıyn, bul úshin ǵylymı bilim jáne materıaldyq-tehnıkalyq turǵydan qajetti bazamyz bar. 65 jyldan astam ýaqyttan beri jeńil jáne tamaq ónerkásibi úshin daıarlanyp kele jatqan mamandar sapasyn da, sanyn da arttyrý – ýnıversıtet ujymy úshin abyroıly mindet.
Talǵat QULAJANOV,
Almaty tehnologııalyq ýnıversıtetiniń rektory, akademık
