Sýretti túsirgen Rýslan Qadyrov, «EQ»
Lagerdiń ashylýyna qatysqan oblys ákimi Beıbit Isabaev aldymen ondaǵy shyǵarmashylyq úıin aralap, daryndy balalardyń qolóner jáne sýret kórmesimen tanysty. Nysannyń ishki jaǵdaıyn baǵamdap, jatyn bólmelerin, ashanasyn aralap kórdi, balalarmen tildesti. Saltanatty sharada balalardy quttyqtaǵan aımaq basshysy óńirde oqýshylardyń jazǵy demalysyn uıymdastyrýǵa erekshe kóńil bólinip otyrǵanyn aıtty.
– Halyqaralyq, respýblıkalyq básekelerde top jarǵan ónerli, bilimdi 100 bala «Jalyn» lagerine jınalyp otyr. Biz balalardyń zamanǵa saı bilim alýyna, paıdaly demalysyna erekshe basymdyq beremiz. Qazir ǵylym men tehnıkanyń zamany. Bilimdi, tehnologııany jaqsy meńgergen jastary bar memleket qana ozyq bolady. Aldaǵy ýaqytta da bilim men óner jarystarynda Qazaqstannyń, Jetisý oblysynyń mártebesin kóterip, jetistikterge jete berińizder. Jazǵy demalysty tamasha ótkizip, oqý jylyna jańa serpinmen, kúsh-jiger jınap kelýlerińizge tilektespin, – dedi B.Isabaev.
Aqjarma tilekten keıin oblys basshysy halyqaralyq jáne respýblıkalyq zııatkerlik sharalar jeńimpazdaryn marapattady. Sonyń ishinde respýblıkalyq «Bastaý» olımpıadasynda I oryn alǵan Kóksý aýdany Q.Jalaıyrı atyndaǵy mekteptiń 3-synyp oqýshysy Janbota Bolatqa jáne halyqaralyq «Týımaada» olımpıadasynyń III oryn ıegeri, M.Aryn atyndaǵy №24 mamandandyrylǵan lıseıiniń 10-synyp oqýshysy Aqbota Jumabekovaǵa 300 myń teńge tabystady. Budan bólek, halyqaralyq «Aıbyn – 2023» áskerı-patrıottyq jastar jıynynda júldegerler tuǵyrynan kóringen Taldyqorǵan qalasyndaǵy B.Jolbarysuly atyndaǵy №18 orta mektep-lıseıiniń áskerı-patrıottyq «Jas desantshylar» klýbyna 500 myń teńge tartý etti. Sondaı-aq О́zbekstanda ótken halyqaralyq horeografııalyq óner baıqaýynyń bas júldesin jeńip alǵan Kóksý aýdanyndaǵy «О́ner» mektebiniń «Kerbez» joǵary bı tobyna jáne qyzdar voleıbol komandalarynyń arasyndaǵy respýblıkalyq ulttyq mektep lıgasynyń júldeger atanǵan komandasyna 1 mln teńge berildi. Tynyǵýshy oqýshylar atynan Nurasyl Sháripov quttyqtaý sózin jetkizip, balalar fleshmob bıledi.
О́ńir ákimi baspasóz qyzmetiniń málimetinshe, «Jalyn» jazǵy saýyqtyrý lageri árqaısysy 20 orynǵa arnalǵan 5 korpýstan turady. Nysannyń qurylysyna 1 mlrd 15 mln teńge bólinip, qurylys jumystaryn «Dáýlet-Serpin» JShS júrgizdi. Ǵımarattyń jalpy alańy 11 709 sharshy metr. Bir aýysymda 100 bala qabyldaı alatyn lagerde 100 oryndyq mádenıet úıi, 60 oryndyq ashana, 5 balalar oıyn alańy, 1 jattyǵýǵa arnalǵan sport alańy, 10 demalys orny bar. Materıaldyq-tehnıkalyq bazasy jasaqtalyp, ınteraktıvti taqta, kompıýterler, sporttyq oıyndarǵa arnalǵan jabdyqtar, mýzykalyq aspaptar qoıylǵan. Qazir munda 13 adam jumys isteıdi, sonyń ishinde júzý jetekshisi, dene shynyqtyrý mamany, tárbıeshi, mýzyka jetekshisi sııaqty arnaıy mamandar bar.
Lagerdiń birinshi aýysymynda oblystaǵy halyqaralyq, respýblıkalyq olımpıada, ǵylymı joba baıqaýlarynyń jeńimpazdary men sport, óner baǵytyndaǵy daryndy balalar demalyp jatyr. Kelesi aýysymda oblystaǵy áskerı patrıottyq klýbtar, kadet synyptary, «Jas sarbaz» qozǵalysy jáne respýblıkalyq debat qozǵalysynyń jeńimpazdary qamtylady. Al kelesi jyly jaz mezgilinde munda 1 200 bala demalyspen qamtylady dep josparlanǵan. Jalpy, bıyl Jetisý oblysynda 10 myńnan asa bala osyndaı qala syrtyndaǵy lagerde demalady.
Jetisý oblysy
