Qazirgi Túrkistan oblysy, Otyrar aýdany, osy kúnderi Shámshi Qaldaıaqovtyń esimimen atalatyn aýylda 1930 jyly dúnıege kelgen.
Ekinshi dúnıejúzilik soǵys jyldaryna balalyq shaǵy tuspa-tus kelgen ol tylda jumys istedi, 1950 jyly Saryaǵashtaǵy Qaplanbek maldárigerlik tehnıkýmyn támamdady. Áskerı boryshyn Qıyr Shyǵysta 1951-1954 jyldary ótegen. 1956-1962 jyldary Almaty memlekettik konservatorııasynda oqyǵan.
1950 jyldan beri shyǵarmashylyqpen aınalysqan dańqty kompozıtor 40 jyldan astam ýaqytta 300-ge jýyq án jazǵan desedi. «Ana týraly jyr», «Saǵynyshym meniń», «Arys jaǵasynda», «Tamdy arýy», «Qaıyqta», «Aq bantık», «Keshikpeı kelem dep eń», «Qýanysh valsi», «Jaqsygúl», «Ánim sen ediń» jáne taǵy basqa ánderi alty alashty sharlap ketkeni málim.
Sh.Qaldaıaqovqa 1991 jyly Qazaqstannyń halyq ártisi ataǵy berildi.
1991 jyly Shámshi Qaldaıaqov týraly «Jyldarym meniń, jyrlarym meniń» atty ǵumyrnamalyq derekti fılm túsirilgen.
Kompozıtor uzaqqa sozylǵan aýyr dertten 1992 jyly 29 aqpanda 62 jasynda qaıtys boldy.
1992 jyldan beri Shámshi Qaldaıaqov atyndaǵy festıval dástúrli túrde ótkizilip keledi.
Máńgilik ólmeıtuǵyn qazyna qaldyrǵan ańyz adam Shámshi Qaldaıaqov baılyq-ataqqa malynbasa da qalyń qazaqtyń alaqanynda ótti.
