Ádette, jergilikti turǵyndar men qala qonaqtary bala-shaǵasyn ertip, kóbine osy saıabaqtaǵy attraksıondarǵa minip, balmuzdaq kafelerinde otyryp, bir aýyq serýendep ketip jatady. Demalys kúnderi jurt aıaǵy tún jarymǵa deıin tolastamaıdy. Al kún uıasyna qonyp, qas qaraıǵan soń bastalǵan ǵajaıyp sýburqaqtyń alǵash ret iske qosylý sátin tamashalaýǵa kelgen jurttyń qarasy qalyń boldy.
– Kópten kútken sýburqaqtyń ashylý saltanatyna otbasymyzben, balalarymyzben kelip otyrmyz. О́te qýanyshtymyz. Qalamyzda buryn-sońdy mundaı áýendi sýburqaq bolmaǵan. Buryn munda kelip jaı ǵana serýendep, balmuzdaq jep, balalardy qydyrtyp ketýshi edik, endi osy fontannyń janyndaǵy sákige otyryp mýzyka tyńdap, mundaǵy keremet kórinisti tamashalap, bir aýyq demalyp, tipti júıkeni tynyqtyryp alýǵa da bolady, – deıdi qala turǵyny Sáýle Kópjasarova.
Qurylysty júrgizgen merdiger de erekshe nysannyń asa joǵary talǵammen salynǵanyn aıtty. Áýen tańdaýǵa da asa mán berilgen.
– 20 áýen iriktelip alyndy. Ulttyq mýzyka, álemdik klassıka, zamanaýı saz kezektesip otyratyndaı 3 toptama jasaldy. Odan keıin taǵy bir jınaq jasaımyz. Jurtty mezi qylmaıtyndaı, turǵyndardyń kóńilinen shyǵatyndaı kompozısııa qurastyrýǵa tyrystyq. Mundaı kópáýendi sýburqaq basqa jerde joq, – dedi merdiger kompanııanyń basshysy Edýard Petýshko.
Mýzykalyq sýburqaqty salýǵa jergilikti bıýdjetten 130 mıllıon teńgege jýyq qarjy bólingen. 350 búrikkishten, sonshalyqty jaryq shamnan turatyn tutas júıe avtomattandyrylǵan ortalyqtan basqarylady.
– Munyń bir yńǵaıly tusy – sýburqaqtyń óziniń tazartý tetigi bar. Iаǵnı qajet kezinde sýdy toltyryp nemese keri aǵyzyp jiberip otyrady. Tasymaldap áýre bolmaısyń. Basty artyqshylyǵy – osy. Bıyl Qostanaıda 6 sýburqaq qaıta jóndeledi. Qazir sonyń tórteýi jumys istep tur. Qalǵan ekeýi jaqyn kúnderi iske qosylady. Keler jyly da qaladaǵy sýburqaqtardyń birazyn kúrdeli jóndeýden ótkizý josparlanyp otyr, – deıdi qalalyq TÚKSh, jolaýshylar kóligi jáne avtomobıl joldary bóliminiń basshysy Danııar Sábıtov.
Taıaýda ǵana iske qosylǵan jaıaý júrginshiler sýburqaǵy da búginde qala turǵyndary jıi baratyn demalys ornyna aınaldy. Endi qala kúni merekesi qarsańynda A.Baıtursynuly atyndaǵy óńirlik ýnıversıtet pen Fransýz ortalyǵynyń aldynan taǵy eki sýburqaq iske qosylmaq.
Qostanaı
