Jıynda jyldan-jylǵa azamattyq sektordyń belsendiligi kúsh alyp kele jatqany sóz boldy. Máselen, Qostanaı oblysyndaǵy úkimettik emes uıymdardyń sany keıingi 3 jyl ishinde 30 paıyzǵa artyp, búginde myńnyń ústine shyqqan. Memlekettik áleýmettik tapsyrysty qarjylandyrý kóleminiń de birshama óskeni baıqalady.
– Bıyl memlekettik áleýmettik tapsyrystardy qarjylandyrý kólemi 1 mlrd teńgeden asty. Bul qarajattyń aıasynda azamattyq qoǵamdy yntalandyrýǵa baǵyttalǵan jobalar qatary eselendi. Búginde, jalpy alǵanda oblys boıynsha 300 joba júzege asyrylyp jatyr. Qoǵamdyq-ekonomıkalyq, saıası damý jolynda qazir elimizde óńirlerdi damytýǵa kóp kóńil bólinip otyr. Ony endi bılikti ortalyqsyzdandyrý, ınvestorlar nazaryn aımaqtarǵa burý, ásirese, shekaralas óńirlerge baǵyttaý sııaqty is-áreketterden ańǵarýǵa bolady. Bul rette azamattyq qoǵamǵa úlken mindet artylady jáne halyqaralyq seriktestikti nyǵaıtýdyń mańyzy zor. Bul endi eki jylda bir ret ótip turatyn dástúrli forým bolǵandyqtan, árbir forýmnyń nátıjesinde memlekettik organdarǵa úkimettik emes uıymdardy damytýǵa baǵyttalǵan usynystar jiberilip, ol eki jyl ishinde júzege asyrylady. Búgingi forýmnyń eń basty maqsaty – azamattyq qoǵamdy damytý baǵytynda jasalyp jatqan jumystardy odan ári ilgeriletý, – deıdi oblystyq qoǵamdyq damý basqarmasy basshysynyń orynbasary Abylaıhan Kákenov.
Jambyl oblystyq «Azamattyq alıansynyń» prezıdenti Islambek Dastannyń aıtýynsha, jıyn elimizdiń ár aımaǵynda jumys istep jatqan qoǵamdyq uıymdardyń ózara tájirıbe almasyp, yntymaqtastyǵyn arttyrýǵa septigin tıgizedi.
– Jambyl oblysy Qyrǵyzstanmen, Qostanaı oblysy Reseımen shekaralasyp jatyr. Biz forýmda osy sheteldik áriptesterimizben birlese otyryp, tájirıbe almastyq, pikirlestik. Olardyń qalaı jumys istep jatqanyn jáne memlekettik jobalardy júzege asyrýda qandaı aspektilerge, qandaı tájirıbelerge súıenetinin kóńilge túıdik, – deıdi I.Dastan.
Forýmda sóz alǵan Nıderland Koroldiginiń Ortalyq Azııadaǵy elshisiniń orynbasary Naýt Van Vaýdenberg kópshilikke osydan eki jyl buryn Qostanaıdaǵy polısııa akademııasy jáne Ishki ister mınıstrligimen birlesip, jeke basqa qatysty aqparatty jarııalaýdy demokratııalyq negizge keltirý baǵytynda biraz sharýa atqarǵanyn jáne ol jobalardyń sátti shyqqanyn aıtty.
Búginde qostanaılyq úkimettik emes uıymdar qoǵamdyq ómirdiń negizgi 20 baǵyty boıynsha belsendi jumys istep jatyr. Olardyń qyzmeti san salany qamtıdy. Azamattyq sektordyń belsendiligi aýyldyq aımaqtarda da baıqalyp otyr.
– Júıeli jumystardyń arqasynda úkimettik emes uıymdardyń sany aýyldyq jerlerde artyp keledi. Mysaly, 2018 jyly olardyń úlesi nebári 25 paıyzdy qurasa, búginde 40 paıyzdan asqan, – deıdi oblys ákiminiń orynbasary Erlan Spanov.
Alqa otyrysynan keıin jıynǵa qatysýshylar halyqaralyq uıymdar arasyndaǵy seriktestikti damytý, buqaralyq aqparat quraldarymen birlese jumys júrgizý jáne úkimettik emes uıymdardy qarjylandyrýdy ilgeriletý, san salaǵa bólinip jatqan memleket qarjysyna qoǵamdyq baqylaý, monıtorıng jasaý, jergilikti jerlerde bólinip jatqan bıýdjettiń qanshalyqty tıimdi jumsalyp jatqanyn qadaǵalaýdy júzege asyrý baǵytyndaǵy úsh seksııaǵa bólindi.
Forým aıasynda qoǵam belsendileri ózara pikir almasyp qana qoımaı, áleýmettik áriptestik baǵytynda iskerlik baılanys ornatý týraly ýaǵdalasyp, aldaǵy ýaqytta Astanada ótetin azamattyq forýmda aıtylatyn usynymdaryn tııanaqtap aldy.
Qostanaı oblysy
