Agenttik tóraǵasynyń aıtýynsha, úshinshi irikteýdiń ereksheligi memlekettik apparattyń salalyq kadrlarǵa qajettiligin eskere otyryp, maqsatty irikteý júrgizý bolmaq. Osylaısha, kezekti irikteý ınfraqurylymdy, ónerkásipti damytý jáne saýda saıasaty, agroónerkásiptik keshen jáne qorshaǵan ortany qorǵaý, syrtqy saıasat jáne ınvestısııalar, ekonomıkalyq jáne qarjylyq saıasat, sıfrlandyrý jáne áleýmettik saıasat jáne azamattyq qoǵam sekildi 6 negizgi sala boıynsha júrgiziledi. Osyǵan oraı bıyl úmitkerlermen áńgimelesý mindetti túrde salalyq ortalyq organdar ókilderiniń qatysýymen ótkiziledi.
Talaptarǵa sáıkes, irikteýge jasy 35-ten aspaǵan, joǵary bilimi jáne 5 jyl jalpy jumys tájirıbesi bar, memlekettik tildi V1 deńgeıinen tómen emes meńgergen Qazaqstan Respýblıkasynyń azamaty qatysa alady.
Prezıdenttik jastar kadr rezerviniń múshesi bolý úshin úmitkerler 6 kezeńnen turatyn keshendi irikteýden ótýge tıis. Birinshi kezeńde 2023 jyldyń 1-30 qyrkúıegi aralyǵynda pkrezerv.gov.kz arnaıy aqparattyq júıesinde jáne onlaın rejimde kandıdattardyń qujattardy qabyldanady. Irikteý obektıvtiligin qamtamasyz etý úshin kandıdattardyń derekteri jeke nómir berý arqyly jasyrylady. Osylaısha, baǵalaýshylar úmitkerdiń kim ekendigin bilmeıdi.
Ekinshi kezeńde kandıdattardyń mátindik jáne sandyq aqparatpen jumys isteý qabileti baǵalanady. MQIA basshysy atap ótkendeı, testileý prosesi aýdıo-beıne taspaǵa jazylyp, proktorıng júıesimen qadaǵalanady. Úshinshi kezeńde sıtýasııalyq tapsyrmalar beriledi. Bul kezeń úmitkerlerdiń tańdaǵan salalyq baǵyttaryna baılanysty sıtýasııalyq tapsyrmalar túrindegi naqty problemalardy sheshýge degen kózqarasy eskeriledi. Atalǵan kezeń onlaın-rejimde aýdıo-beıne jazbamen súıemeldenip, esse jazý formatynda júrgiziledi.
«Oryndalǵan tapsyrmanyń sheshimi qyzmettiń tıisti baǵyttary boıynsha bir ýaqytta úsh salalyq sarapshymen baǵalanady. Sarapshylar pýly akademııalyq orta men bıznes qaýymdastyq ókilderin, memlekettik qyzmetshilerdi qamtıdy», dedi Darhan Jazyqbaev.
Tórtinshi kezeńde assessment-ortalyǵy men quzyretter boıynsha suhbat ótedi. Assessment-ortalyq Memlekettik basqarý akademııasynyń bazasynda oflaın formatta ótedi. Ol minez-qulyq ındıkatorlary arqyly kandıdattardyń boıyndaǵy belgilengen quzyretterdi anyqtaýǵa jáne baǵalaýǵa baǵyttalǵan. Kandıdattardyń minezin baǵalaý toptyq jáne jeke tapsyrmalardan turady. Jalpy quzyretterdi keminde 15 sertıfıkattalǵan baǵalaýshy jáne 5 sýpervızor baǵalaıdy.
Al besinshi kezeńde kandıdattar sarapshylyq komıssııa múshelerimen áńgimelesedi. Onyń quramyna memlekettik organdardyń basshylary kiredi. Nátıjesinde, Ulttyq komıssııa otyrysynda qaraýǵa usynylatyn qatysýshylardyń tizimi jasalady. Altynshy, sońǵy kezeńde Ulttyq komıssııanyń otyrysy ótip, Prezıdenttik jastar kadr rezervine úzdik 50 kandıdat qabyldanady. PJKR talaptaryna sáıkes rezervke alynǵan adamdar zańnamada belgilengen tártippen memlekettik saıası laýazymdarǵa, «A» korpýsynyń memlekettik ákimshilik laýazymdaryna, «B» korpýsynyń basshylyq jáne A sanattar tobynyń laýazymdaryna taǵaıyndalýy múmkin.
Darhan Jazyqbaevtyń aıtýynsha, agenttik irikteýdiń barynsha ashyqtyǵy men obektıvtiligin qamtamasyz etýge baǵyttalǵan. Kandıdattardy baǵalaý nátıjeleri olardyń jeke kabınetinde jáne kezeń qorytyndysy pkrezerv.gov.kz saıtynda jarııalanyp, barlyq azamattar úshin qatysýshylar týraly aqparat qoljetimdi bolady.
Brıfıng sońynda MQIA tóraǵasy jastardy irikteýge belsendi qatysýǵa shaqyryp, kásibı memlekettik qyzmetshilerdiń jańa legin qalyptastyrý mańyzdylyǵyna toqtaldy.
Atap ótsek, 2019 jáne 2021 jyldary rezervke alynǵan 350 adamnyń 264-i memlekettik organdar men kvazımemlekettik sektor uıymdarynda jumys isteıdi, ıaǵnı jalpy sannyń 75%-y jumysqa ornalastyrylǵan. Olardyń 128-i ortalyq memlekettik organdarda, 38-i jergilikti atqarýshy organdarda, 57 adam ulttyq kompanııalarda, 41 adam adam ózge de uıymdarda qyzmet jasap jatyr. Sondaı-aq olardyń qatarynda 31 rezervshi saıası, 6 rezervshi «A» korpýsynyń laýazymdaryna taǵaıyndalǵan, bireýi – Parlament Májilisiniń, ekeýi – máslıhattyń depýtaty.
