Foto: S.Maılybaev. Májilistiń baspasóz qyzmeti.
Konferensııanyń maqsaty – «Halyq únine qulaq asatyn memleket» tujyrymdamasy aıasynda konstıtýsııalyq zańnamany nyǵaıtý. Oǵan Májilis jáne Senat depýtattary, Konstıtýsııalyq Keńestiń burynǵy músheleri, Konstıtýsııalyq Sot janyndaǵy ǵylymı-konsýltatıvtik keńes músheleri, Joǵarǵy Sot, Bas prokýratýra men ózge de memlekettik organdar ókilderi, otandyq jáne sheteldik konstıtýsıonalıst-ǵalymdar qatysty.
«Konstıtýsııa – ózgermeıtin mátin emes, bul – Jańa Qazaqstandy qurýdyń strategııalyq paıymy men mıssııasy. Jańa Qazaqstan – órshil quqyqtyq reformalar men memlekettilikti jańǵyrtý dáýiri. Eldiń quqyqtyq júıesi quqyqtyq tártipti nyǵaıtý, azamattardyń quqyqtaryn qorǵaý jáne zańdylyqty saqtaý baǵytynda belsendi damyp keledi. Osy sharanyń barlyǵy turaqty jáne gúldengen qoǵam qurýǵa yqpal etedi», dedi is-sharany ashqan Parlamentarızm ınstıtýtynyń dırektory, zań ǵylymdarynyń doktory Qanatbek Safınov.
Konferensııaǵa qatysýshylar konstıtýsııalyq zańnamanyń túrli aspektisin, eldiń quqyqtyq jáne saıası júıesin qalyptastyrýdaǵy ekonomıkalyq damýǵa yqpalyn jáne azamattardyń áleýmettik quqyqtary men bostandyqtaryn qamtamasyz etýdegi Ata zańnyń rólin talqylady.
Sondaı-aq sarapshylar konstıtýsııalyq reformany júzege asyrý prosesinde Qazaqstannyń aldynda turǵan kúrdeli máseleler men syn-qaterlerdi, konstıtýsııalyq qurylysty nyǵaıtý jolyndaǵy qadamdary týraly aıtty.
«Qazir elimiz jańartylǵan Konstıtýsııa aıasynda halyqtyń erik-qalaýy basty orynǵa qoıylǵan ádil jáne jańa Qazaqstanda ómir súrip jatyr. Memleket pen qoǵam arasyndaǵy ózara qurmet pen senimge negizdelgen jańa saıası mádenıet qalyptasýda. Mańyzdy sheshimder endi azamattardyń qatysýymen ashyq túrde qabyldanady. Elimizde júrgizilgen konstıtýsııalyq reformalar qoǵamdy demokratııalandyrý, halyq bıliginiń negizderin odan ári nyǵaıtý, Parlamenttiń rólin kúsheıtý, Úkimettiń derbestigin arttyrý jónindegi negizgi qoǵam suranystaryn eskerdi», dedi Májilistiń Zańnama jáne sot-quqyqtyq reforma komıtetiniń tóraıymy Snejanna Imasheva.
Sondaı-aq depýtat búgingi konferensııa elimizde júrgizilgen konstıtýsııalyq reformalardy jan-jaqty talqylaýǵa, konstıtýsııalyq zańnamany odan ári jetildirý maqsatynda jańa ıdeıalar men tásilderdi tabýǵa múmkindik beretinin aıtty.
Forýmdy uıymdastyrýshylar men qonaqtar halyq arasynda konstıtýsııalyq reformanyń máni men onyń nátıjelerin túsindirý boıynsha jumysty jandandyrý qajettigin atap ótti. Jıyn qorytyndysy boıynsha konstıtýsııalyq zańnamany odan ári jetildirý boıynsha usynystar ázirlenetin bolady.
