Foto: uww.org
– Áýeli jeńisiń qutty bolsyn, Ishar. Qazaq eli balýandarynan jastar arasyndaǵy álem chempıonatynyń altyn medalin jeti jyldan beri kútti.
– Rahmet quttyqtaýyńyzǵa. Durys aıtasyz, bizdiń eldiń balýandary jastar arasyndaǵy álem chempıonatynyń bıigine shyǵa almaı kele jatqany namysymyzdy qaırady. Bul meniń jastar arasyndaǵy sońǵy álem chempıonatym edi. Sondyqtan ne bel keter, ne belbeý úziler dep barymdy saldym. Buǵan deıin kishi jasóspirimder, jasóspirimder, jastar arasyndaǵy álem birinshilikterine bes márte qatystym, altyn medal buıyrmady, qola men kúmisti qanaǵat tuttym. Osy joly barymdy saldym.
– Beldesýlerge toqtalsań, qalaı órbidi, qaı eldiń balýanynan qaýiptendiń?
– Kilemdegi qarsylasyńnyń eshqaısy da osal emes. Dese de solardyń ishinde rýmyn balýany Denıs Mıhaımen jolym túıisse qalaı bolar eken degen ishteı ýaıym boldy. О́te tegeýrindi sportshy. Biraq ekeýmiz eki topqa tústik te, ol fınaldyq beldesýge deıin jetpeı, orta jolda súrindi. Osy jolǵy álem chempıonatynyń barlyq beldesýi aýyr ótti, qaı-qaısy da osal emes, jasóspirimder, jastar arasynda álem chempıony atanǵan balýandar, Eýropa, Azııa birinshilikterinde bárin jyqqan jigitter qatysty. Baǵymyz janyp, elimizdiń mereıin tasytqanyma táýbe deımin.
– Fınalda ázerbaıjandyq balýandy uttyń. 2021 jyly Reseıdiń Ýfa qalasynda ótken jasóspirimder arasyndaǵy álem chempıonatynda qola júlde úshin beldesýde ázerbaıjandyq Elmır Álıevke ese jiberip ediń, endi mine Álıevtiń jerlesi Farıd Sadyhlyny fınalda aıqyn basymdyqpen jyqtyń.
– Siz ataǵan Elmır Álıev óte qarýly, tehnıkalyq áleýeti de zor balýan. Negizi 55 keli salmaqta álem chempıonatyna Sadyhly emes, Álıev qatysýy tıis edi. Jattyǵý jıynynda qolyn jaraqattap alyp joly túspedi. О́zim de Álıevti kútken edim, eki jyl burynǵy ketken eseni qaıtarsam degen ishtegi arpalys áli de bar.
– Biz chempıondardy qurmetteý, qoshemet kórsetýdi keıde asyra oryndap jiberemiz. Tipti keıbirin qushaǵymyzǵa qattyraq qysyp, sporttaǵy bıigine jetýine kedergi keltirgenimizdi de ańdamaı qalamyz. О́zińdi de álem chempıonatynan sán-saltanatpen qarsy aldy. Oblys basshylyǵynan bastap qurmettep jatyr. Kúnde dýman, kúnde toı sportshynyń jattyǵýyna kedergi keltirmeı me?
– Oıyńyzdy túsindim, árıne jatyǵýdan qol úzbeý kerek. Biz álem chempıonatynan oralǵan soń on shaqty kún demalys aldyq. Múmkindiginshe kezdesý, suhbat, jıyn-toıdy sol on kúnniń ishinde ótkerip alsaq deımiz. Ári qaraı jattyǵýymyzǵa alańsyz kirisý úshin. Durys aıtasyz, sportshy bir kúndik jattyǵýdan qol úzse, fızıkalyq áleýetin qalpyna keltirýge az kúsh jumsamaıdy. Jattyǵý kezindegi júkteme de eselep arta túsedi. Munyń bári de júrekke salmaq. Sondyqtan oqý-jattyǵý jıyndary kezinde barynsha babymyzdy joǵaltyp almas úshin qydyrý, toı toılaý sekildi ǵadetti keıinge ysyramyz. Biz úshin mańyzdysy aıanbaı ter tógip, tynymsyz jattyǵý ǵana.
– Endigi meje olımpıada shyńy ǵoı. Jaqsylyq Úshkempirov, Shámil Serikovtiń jazǵy olımpıada oıyndarynan altyn medal oljalaǵanyna 43 jyl, Iýrıı Melnıchenkonyń Atlanta olımpıadasynan altyn medalmen oralǵanyna 27 jyldan asty. Bizdiń eldiń balýandaryna tórt jylda aınalyp soǵatyn dodanyń altyn medali áli buıyrar emes.
– Bárimizdiń de janymyzǵa batady árıne. Degenmen de úmitimizdi úzbeıik, talantty jastardyń shoǵyry ósip keledi, solardyń arasynan mańdaıy jarqyrap myqty balýandar shyǵatynyna bek senemin. Tek eńbektenip jattyǵý kerek. Meniń de armanym olımpıada chempıony atanyp, elimdi qýantsam deımin.
– 55 kelide kúresip júrsiń, olımpıadalyq salmaq sanalatyn 60 kelige aýysasyń ba?
– Dál búgin-erteń 60 kelige ótemin demeımin. О́ıtkeni olımpıadalyq salmaq bolǵandyqtan báseke óte joǵary. Jer júzinde ǵana emes, óz elimizde de 60 kelide balýandardyń bási joǵarylap keledi. Ázirge osy 55 kelide kúresemin. Eresekter arasyndaǵy álem chempıonatyna da osy ózimniń salmaǵymda qatysyp, chempıon atanǵym keledi. Odan keıin 60 keli salmaq dárejesinde baǵymdy synap kórsem deımin.
– Áńgimeńizge rahmet!
Áńgimelesken Qýanysh NURDANBEKULY,
«Egemen Qazaqstan»
