Tuńǵysh ret Petropavl qalasynda uıymdastyrylǵan bul baıqaýdy Til saıasaty komıteti Memlekettik tildi damytý jáne lıngvıstıkalyq jumystar basqarmasynyń basshysy Gúlfarıza Muqan quttyqtaý sózben ashyp: «Álemdegi jahandaný úderisi ár halyqtyń aldyna ózderiniń ulttyq rýhanı-mádenı qundylyqtaryn jandandyrý mindetin qoıyp otyr. Osy rette biz úshin qazaq tiliniń áleýmettik mártebesin joǵarylatý, memlekettik tildi rýhanı-mádenı qundylyq retinde dáripteý asa mańyzdy. Bıylǵy baıqaý qyzmet kórsetý salasy boıynsha ótkizilip otyr», dedi ol.
Memlekettik tildiń qoldanys aıasyn keńeıtý maqsatynda uıymdastyrylǵan baıqaý «Juldyzdy sát», «Sózdiń kórki», «Oı ushqyny», «Ushqyr suraq, utqyr jaýap» dep atalatyn tórt kezeńnen quralyp, oǵan óńirlerden iriktelip kelgen úzdikter qatysty.
Úzdikterdi saralaǵan fılologııa ǵylymdarynyń doktory Qasıet Kákenuly bastaǵan qazylar alqasynyń sheshimimen bas júlde Pavlodar qalasy Halyqqa qyzmet kórsetý ortalyǵynyń qyzmetkeri Gross Ingaǵa buıyrsa, birinshi orynǵa Orta Azııa Innovasııalyq ýnıversıtetiniń «Aýdarma isi» mamandyǵy boıynsha 4-kýrs stýdenti Intızora Nýsratýllaeva laıyqty dep tanyldy. Ekinshi oryndy Ulytaý oblysy, Qarajal qalasy Jáırem ken baıytý kombınatynyń bas mamany Maksım Entalsev jeńip aldy. Úshinshi oryn «Qazaqtelkom» AQ fılıalynyń korporatıvtik bıznes jónindegi satý úderisterin qoldaý sektorynyń mamany Adelıa Mýrzınaǵa buıyrdy. Qalǵan qatysýshylar yntalandyrý syılyǵyna ıe boldy.
